سیدہ صفیہ رضی اللہ عنہا سے روایت ہے کہ رسول اللہ صلی اللہ علیہ وسلم میرے پاس تشریف لائے اور میرے سامنے چار ہزار کھجور کی گٹھلیاں پڑی تھیں جن پر میں تسبیح پڑھ رہی تھی، آپ صلی اللہ علیہ وسلم نے پوچھا: ”اے حُیی کی بیٹی! یہ کیا ہے؟“ میں نے عرض کیا: میں ان پر تسبیح پڑھ رہی ہوں، آپ صلی اللہ علیہ وسلم نے فرمایا: ”جب سے میں تمہارے پاس آ کر کھڑا ہوا ہوں، میں نے اس سے بھی زیادہ تسبیح پڑھ لی ہے“، میں نے عرض کیا: اے اللہ کے رسول! مجھے بھی سکھا دیں، آپ صلی اللہ علیہ وسلم نے فرمایا: ”کہو: «سُبْحَانَ اللَّهِ عَدَدَ مَا خَلَقَ مِنْ شَيْءٍ» ”اللہ کی تسبیح ہے اس کی پیدا کردہ ہر چیز کی تعداد کے برابر۔““
یہ حدیث صحیح الاسناد ہے لیکن شیخین نے اسے روایت نہیں کیا، اور مصری راویوں کی ایک حدیث سے اس کا شاہد بھی موجود ہے جس کی سند اس سے بھی زیادہ صحیح ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2031]

سیدنا سعد بن ابی وقاص رضی اللہ عنہ سے روایت ہے کہ وہ نبی کریم صلی اللہ علیہ وسلم کے ہمراہ ایک خاتون کے پاس گئے جس کے سامنے گٹھلیاں یا کنکریاں پڑی تھیں جن پر وہ تسبیح پڑھ رہی تھی، آپ صلی اللہ علیہ وسلم نے فرمایا: ”کیا میں تمہیں وہ چیز نہ بتاؤں جو تمہارے لیے اس سے زیادہ آسان اور افضل ہو؟ تم کہو: «سُبْحَانَ اللَّهِ عَدَدَ مَا خَلَقَ فِي السَّمَاءِ، سُبْحَانَ اللَّهِ عَدَدَ مَا خَلَقَ فِي الْأَرْضِ، سُبْحَانَ اللَّهِ عَدَدَ مَا بَيْنَ ذَلِكَ، وَسُبْحَانَ اللَّهِ عَدَدَ مَا هُوَ خَالِقٌ، اللَّهُ أَكْبَرُ مِثْلَ ذَلِكَ، وَالْحَمْدُ لِلَّهِ مِثْلَ ذَلِكَ، وَلَا إِلَهَ إِلَّا اللَّهُ مِثْلَ ذَلِكَ، وَلَا قُوَّةَ إِلَّا بِاللَّهِ مِثْلَ ذَلِكَ» ”اللہ کی تسبیح ہے ان چیزوں کی تعداد کے برابر جو اس نے آسمان میں پیدا کیں، اللہ کی تسبیح ہے ان چیزوں کی تعداد کے برابر جو اس نے زمین میں پیدا کیں، اللہ کی تسبیح ہے ان چیزوں کی تعداد کے برابر جو ان کے درمیان ہیں، اور اللہ کی تسبیح ہے ان چیزوں کی تعداد کے برابر جن کا وہ پیدا کرنے والا ہے، اور اللہ کی بڑائی ( «الله اكبر») بھی اسی قدر ہے، اللہ کی حمد ( «الحمد لله») بھی اسی قدر ہے، اللہ کی یکتائی ( «لا اله الا الله») بھی اسی قدر ہے، اور گناہوں سے بچنے اور نیکی کرنے کی طاقت ( «لا حول ولا قوة الا بالله») بھی اسی قدر ہے۔““ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2032]