سیدنا جابر رضی اللہ عنہ سے روایت ہے کہ ایک شخص فوت ہو گیا، ہم نے اسے غسل دیا، کفن پہنایا، خوشبو لگائی اور اسے رسول اللہ صلی اللہ علیہ وسلم کے لیے مقامِ جبریل کے قریب جنازہ گاہ میں رکھ دیا، پھر ہم نے رسول اللہ صلی اللہ علیہ وسلم کو نماز جنازہ کی اطلاع دی، آپ صلی اللہ علیہ وسلم ہمارے ساتھ چند قدم تشریف لائے پھر فرمایا: ”شاید تمہارے ساتھی پر کوئی قرض ہے؟“ لوگوں نے عرض کیا: جی ہاں، دو دینار، تو آپ صلی اللہ علیہ وسلم پیچھے ہٹ گئے، پھر ہم میں سے ایک شخص نے جنہیں ابو قتادہ کہا جاتا تھا عرض کیا: اے اللہ کے رسول! وہ دونوں دینار میرے ذمے ہیں، تو رسول اللہ صلی اللہ علیہ وسلم نے دریافت فرمایا: ”کیا وہ تمہارے ذمے ہیں اور تمہارے مال میں سے ادا ہوں گے اور میت اس سے بری ہو جائے گی؟“ انہوں نے عرض کیا: جی ہاں، تب آپ صلی اللہ علیہ وسلم نے اس کی نماز جنازہ پڑھائی، اس کے بعد رسول اللہ صلی اللہ علیہ وسلم جب بھی ابو قتادہ سے ملتے تو پوچھتے: ”ان دو دیناروں کا کیا ہوا؟“ یہاں تک کہ آخر میں انہوں نے عرض کیا: اے اللہ کے رسول! میں نے وہ ادا کر دیے ہیں، تو آپ صلی اللہ علیہ وسلم نے فرمایا: ”اب تم نے اس کی جلد کو ٹھنڈک پہنچائی ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْبُيُوعِ/حدیث: 2377]