سیدنا قاسم بن محمد رضی اللہ عنہ فرماتے ہیں کہ میں سیدنا عبداللہ بن عمرو رضی اللہ عنہ کے پاس موجود تھا، ایک شخص آپ کے پاس آ کر کہنے لگا: میں سفر کا ارادہ رکھتا ہوں تو سیدنا عبداللہ نے کہا: ذرا انتظار کرو تاکہ میں تجھے اس طرح الوداع کروں جیسے رسول اللہ ہمیں الوداع کیا کرتے تھے پھر آپ نے یوں دعا مانگی: (اَسْتَوْدِعُ اللّٰہَ دِیْنَکَ وَاَمَانَتَکَ وَخَوْاتِیْمَ عَمَلِک) ” میں تیرا دین تیری امانت اور تیرے اعمال کے خاتمے، اللہ کے سپرد کرتا ہوں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كِتَابُ: الْجِهَادِ/حدیث: 2506]

سیدنا قزعہ رضی اللہ عنہ بیان کرتے ہیں: مجھے ابن عمر رضی اللہ عنہما نے کہا: میں تجھے اس طرح الوداع کروں گا جس طرح رسول اللہ صلی اللہ علیہ وسلم نے مجھے الوداع کیا تھا (پھر انہوں نے یہ دعا مانگی) میں تیرے دین، امانت اور تیرے اعمال کے خاتموں کو اللہ تعالیٰ کو سپرد کرتا ہوں۔ ٭٭ انس بن مالک رضی اللہ عنہ اور عبداللہ بن زید انصاری رضی اللہ عنہ سے مروی احادیث مذکورہ حدیث کی شاہد ہیں۔ سیدنا انس بن مالک رضی اللہ عنہ کی حدیث۔ [المستدرك على الصحيحين/كِتَابُ: الْجِهَادِ/حدیث: 2507]

سیدنا انس رضی اللہ عنہ فرماتے ہیں: ایک شخص نبی اکرم صلی اللہ علیہ وسلم کے پاس آ کر کہنے لگا: یا رسول اللہ صلی اللہ علیہ وسلم ! میں سفر کا ارادہ رکھتا ہوں، مجھے زادِراہ دیجئے، آپ صلی اللہ علیہ وسلم نے فرمایا: اللہ تعالیٰ تجھے تقویٰ کا حصہ عطا فرمائے، انہوں نے کہا: کچھ مزید عطا کر دیں، آپ صلی اللہ علیہ وسلم نے فرمایا: اور اللہ تعالیٰ تیرے گناہ بخش دے، انہوں نے کہا: میرے ماں باپ آپ پر قربان کچھ مزید عطا کر دیجئے، آپ صلی اللہ علیہ وسلم نے فرمایا: تو جہاں بھی رہے اللہ تعالیٰ تیرے لیے نیکیاں آسان کر دے۔ عبداللہ بن یزید رضی اللہ عنہ کی حدیث۔ [المستدرك على الصحيحين/كِتَابُ: الْجِهَادِ/حدیث: 2508]

سیدنا محمد بن کعب قرظی رضی اللہ عنہ بیان کرتے ہیں: سیدنا عبداللہ بن یزید رضی اللہ عنہ کو کھانے کی دعوت دی گئی۔ جب وہ آ گئے تو فرمایا: رسول اللہ صلی اللہ علیہ وسلم کی عادت تھی کہ جب آپ کسی لشکر کو روانہ کرتے تو یوں دعا کرتے: ” میں تمہارے دین، امانت اور تمہارے خاتمہ اعمال کو اللہ کے سپرد کرتا ہوں “۔ [المستدرك على الصحيحين/كِتَابُ: الْجِهَادِ/حدیث: 2509]