سیدنا علی رضی اللہ عنہ روایت کرتے ہیں، انہوں نے ایک لونڈی اور اس کے بچے کو الگ الگ فروخت کر دیا تو نبی اکرم صلی اللہ علیہ وسلم نے ان کو اس بات سے منع فرمایا اور سودا منسوخ کر دیا۔ [المستدرك على الصحيحين/كِتَابُ: الْجِهَادِ/حدیث: 2607]

سیدنا علی رضی اللہ عنہ کا بیان ہے: صلح حدیبیہ کے موقع پر صلح سے پہلے دو غلام بھاگ کر رسول اللہ صلی اللہ علیہ وسلم کے پاس آ گئے، ان کے مالکوں نے آپ کی جانب مکتوب لکھا جس میں یہ تھا: اے محمد صلی اللہ علیہ وسلم ! خدا کی قسم! یہ لوگ آپ کے دین میں شوق کی وجہ سے آپ کے پاس نہیں آئے بلکہ یہ تو غلامی سے بھاگنے کے لیے یہاں سے گئے ہیں، کچھ لوگوں نے کہا: یا رسول اللہ! یہ بات صحیح معلوم ہوتی ہے آپ صلی اللہ علیہ وسلم ان کو واپس بھیج دیجئے، اس پر رسول اللہ صلی اللہ علیہ وسلم ناراض ہو گئے اور فرمایا: اے اہلِ قریش! تم پیچھے کیوں ہٹ رہے ہو؟ (کہ اگر تم یونہی پیچھے ہٹتے رہے) تو اللہ تعالیٰ تم پر ایسا شخص مسلط کر دے گا جو اسی بناء پر تمہاری گردنیں مار دے گا اور آپ صلی اللہ علیہ وسلم نے ان کو واپس بھیجنے سے انکار کر دیا۔ اور فرمایا: یہ اللہ کے آزاد کردہ ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كِتَابُ: الْجِهَادِ/حدیث: 2608]