سیدنا ابوموسیٰ اشعری رضی اللہ عنہ فرماتے ہیں: ہم نے اس مسجد (بصرہ کی مسجد) میں قرآن کی تعلیم حاصل کی ہے، ہم حلقے بنا کر بیٹھا کرتے تھے اور ان کا دو سفید کپڑوں میں ملبوس ہونا آج بھی میری نظروں میں اسی طرح ہے اور انہی سے میں نے اِقْرَأ باسم ربّک الذی خلق سورت پڑھی تھی۔ انہوں نے فرمایا: محمد صلی اللہ علیہ وسلم پر نازل ہونے والی یہ سب سے پہلی سورت ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ درج ذیل حدیث مذکورہ حدیث کی شاہد ہے جو کہ امام مسلم رحمۃ اللہ علیہ کے معیار کے مطاق ” صحیح الاسناد “ ہے۔ [المستدرك على الصحيحين/كِتَابُ التَّفْسِيرِ/حدیث: 2908]

ام المومنین سیدہ عائشہ رضی اللہ عنہا فرماتی ہیں: سب سے پہلے سورۃ ” اقرا باسم ربّک الذی خلق “ نازل ہوئی۔ [المستدرك على الصحيحين/كِتَابُ التَّفْسِيرِ/حدیث: 2909]

سیدہ عائشہ رضی اللہ عنہا فرماتی ہیں: قرآن کریم کی سب سے پہلے نازل ہونے والی سورت ” اقرأ باسم ربک الذی خلق “ ہے۔ [المستدرك على الصحيحين/كِتَابُ التَّفْسِيرِ/حدیث: 2910]