سیدنا علی رضی اللہ عنہ فرماتے ہیں: اللہ تعالیٰ کے نبی سیدنا عزیر علیہ السلام جب اپنے شہر سے نکلے تو وہ نوجوان تھے۔ ان کا گزر ایک تباہ شدہ بستی سے ہوا، وہ کہنے لگے: اللہ تعالیٰ اس کو مرنے کے بعد دوبارہ کیسے زندہ کرے گا؟ اللہ تعالیٰ نے ان کو سو سال تک فوت کیے رکھنے کے بعد پھر زندہ کیا، سب سے پہلے ان کی آنکھوں کو زندہ کیا، انہوں نے اپنی آنکھوں سے اس منظر کا خود مشاہدہ کیا کہ ان کی بکھری ہوئی ہڈیاں کس طرح ایک دوسری کے ساتھ ملیں، پھر ان پر گوشت چڑھایا گیا، پھر ان میں روح ڈالی گئی، تو اب بھی وہ نوجوان تھے، ان سے پوچھا گیا: تم کتنا عرصہ یہاں ٹھہرے ہو؟ وہ بولے: ایک دن یا دن کا کچھ حصہ، اللہ تعالیٰ نے فرمایا: (نہیں) بلکہ تم تو سو سال یہاں رہے ہو پھر وہ شہر میں آئے تو وہ اپنے پڑوس میں ایک موچی کو نوجوان چھوڑ کر گئے تھے، وہ بہت ہی بوڑھا ہو چکا تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3154]