سیدنا عبداللہ بن عباس رضی اللہ عنہما فرماتے ہیں: قریش نے نبی اکرم صلی اللہ علیہ وسلم سے فرمائش کی کہ آپ اپنے رب سے یہ دعا مانگیں کہ وہ صفا پہاڑ کو سونا بنا دے (اگر ایسا ہو جائے تو) ہم آپ پر ایمان لے آئیں گے۔ آپ صلی اللہ علیہ وسلم نے فرمایا: (کیا واقعی تم) ایمان لے آؤ گے؟ انہوں نے کہا: جی ہاں۔ آپ نے اللہ تعالیٰ کی بارگاہ میں دعا مانگی۔ سیدنا جبریل امین علیہ السلام آپ کے پاس تشریف لائے اور کہنے لگے: آپ کا رب آپ کو سلام کہتا ہے اور فرماتا ہے: اگر آپ صلی اللہ علیہ وسلم چاہیں تو میں ان کے لیے صفا پہاڑ سونا بنا دیتا ہوں (لیکن ایک بات یاد رکھیں کہ اگر اس کے بعد) پھر کسی نے کفر کیا تو میں ان کو ایسا عذاب دوں گا کہ اس کائنات میں کسی کو ایسا عذاب نہیں دیا ہو گا اور اگر آپ چاہیں تو میں ان کے لیے توبہ اور رحمت کے دروازے کھول دیتا ہوں۔ آپ صلی اللہ علیہ وسلم نے عرض کی: اے میرے رب! رحمت اور توبہ کے دروازے (کھول دے)۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3264]