سیدنا عبداللہ بن مسعود رضی اللہ عنہ فرماتے ہیں: تین لوگوں نے سب سے زیادہ نگاہ فراست کا ثبوت دیا تھا۔ (1) عزیز (مصر) جب اس نے اپنی بیوی سے کہا تھا کہ انہیں (یوسف کو) عزت سے رکھو شاید ان سے ہمیں نفع پہنچے یا ان کو ہم بیٹا بنا لیں۔ وہ خاتون جس نے (سیدنا موسیٰ علیہ السلام کے متعلق) کہا تھا: اے میرے باپ ان کو نوکر رکھ لو بے شک بہتر نوکر وہ جو طاقتور امانت دار ہو۔ سیدنا ابوبکر رضی اللہ عنہ نے جو سیدنا عمر رضی اللہ عنہ کے متعلق فراست دکھائی (کہ اپنے بعد ان کو خلیفہ مقرر فرمایا)۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3360]

سیدنا عبداللہ بن مسعود رضی اللہ عنہ سورۂ یوسف کی آیت نمبر 23 کو یوں پڑھا کرتے تھے: (وَقَالَتْ ھَیْتَ لَکَ) (یوسف: 23) ” اور بولی آؤ تم سے کہتی ہوں “ آپ سے اس کی وجہ پوچھی گئی تو آپ نے فرمایا: ہم نے اسی طرح یہ آیت سیکھی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3361]