سیدنا طاؤس رضی اللہ عنہ کا بیان ہے کہ حجر بن قیس المددی امیرالمومنین علی بن ابی طالب رضی اللہ عنہ کے خاص خدمت گزاروں میں سے ہیں، ایک دن سیدنا علی رضی اللہ عنہ نے ان سے کہا: میرے بعد تجھے کھڑا کیا جائے گا اور تجھے مجھ پر لعنت کرنے پر مجبور کیا جائے گا تو تم مجھ پر لعنت کر لینا لیکن مجھ سے برات کا اظہار نہیں کرنا۔ ٭٭ سیدنا طاؤس رضی اللہ عنہ کہتے ہیں میں نے حجر المدری کو دیکھا کہ بنوامیہ کے خلیفہ احمد بن ابراہیم نے ان کو جامع مسجد میں کھڑا کیا اور ایک آدمی کو ان پر مسلط کر دیا کہ یہ شخص یا تو علی کو گالیاں دے ورنہ اس کی گردن مار دی جائے۔ حجر کھڑے ہوئے اور بولے: امیراحمد بن ابراہیم نے مجھے حکم دیا ہے کہ میں سیدنا علی رضی اللہ عنہ پر لعنت کروں تو تم ” اس “ پر اللہ تعالیٰ کی لعنت کرو۔ سیدنا طاؤس کہتے ہیں: اللہ تعالیٰ نے ان کے دلوں کو ایسا اندھا کر دیا کہ ان میں سے ایک آدمی بھی یہ سمجھ ہی نہ سکا کہ حجر ان کو کیا کہہ گئے۔ [المستدرك على الصحيحين/كِتَابُ التَّفْسِيرِ/حدیث: 3406]

سیدنا مسروق رضی اللہ عنہ کہتے ہیں: میں نے سیدنا عبداللہ بن مسعود رضی اللہ عنہ کے پاس پڑھا: اِنَّ اِبْرَاھِیْمَ کَانَ اُمَّۃً قَانِتًا لِّلّٰہِ (النحل: 120) ” بیشک ابراہیم علیہ السلام ایک امام تھا اللہ کا فرمانبردار۔ “ سیدنا ابن مسعود رضی اللہ عنہ نے کہا: بے شک سیدنا معاذ رضی اللہ عنہ ” امۃ قانتا “ تھے (راوی) کہتے ہیں: لوگوں نے دوبارہ آیت کی تلاوت کی تو آپ نے دوبارہ وہی بات دہرائی۔ پھر آپ نے فرمایا: کیا تم جانتے ہو کہ ” امۃ “ سے کیا مراد ہے؟ اس سے مراد وہ شخص ہے جو لوگوں کو بھلائی سکھائے اور قانت وہ ہوتا ہے جو اللہ تعالیٰ اور اس کے رسول صلی اللہ علیہ وسلم کی اطاعت کرے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3407]