سیدنا علی رضی اللہ عنہ اللہ تعالیٰ کے ارشاد: وَ اَلْزَمَھُمْ کَلِمَۃَ التَّقْوٰی) (الفتح: 26) ” اور پرہیزگاری کا کلمہ ان پر لازم فرمایا۔“ کے متعلق فرماتے ہیں (اس سے مراد) ” لَا اِلٰہَ اِلَّا اللّٰہُ وَاللّٰہُ اَکْبَرُ “ ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3759]

سیدنا خیثمہ رضی اللہ عنہ فرماتے ہیں: ایک شخص نے سیدنا عبداللہ رضی اللہ عنہ کے سامنے سورۃ الفتح پڑھی، جب وہ اس آیت پر پہنچا: کَزَرْعٍ اَخْرَجَ شَطْئَہٗ فَاٰزَرَہٗ فَاسْتَغْلَظَ فَاسْتَوٰی عَلٰی سُوْقِہٖ یُعْجِبُ الزُّرَّاعَ لِیَغِیْظَ بِھِمُ الْکُفَّارَ) (الفتح: 29) ” جیسے ایک کھیتی اس نے اپنا پٹھا نکالا پھر اسے طاقت دی پھر دبیز ہوئی پھر اپنی ساق پر کھڑی ہوئی کسانوں کو بھلی لگتی تاکہ ان سے کافروں کے دل جلیں “۔ تو انہوں نے فرمایا: تاکہ اللہ تعالیٰ نبی اکرم صلی اللہ علیہ وسلم اور ان کے صحابہ کے ذریعے کافروں کے دل جلائے۔ پھر سیدنا عبداللہ رضی اللہ عنہ نے فرمایا: تم کھیتی ہو، اس کی کٹائی کا وقت آن پہنچا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3760]

ام المومنین سیدہ عائشہ صدیقہ رضی اللہ عنہا ” لِیَغِیْظُ بِھِمُ الْکُفَّارَ “ کے متعلق فرماتی ہیں: رسول اللہ صلی اللہ علیہ وسلم کے صحابہ رضوان اللہ علیہم اجمعین کو حکم دیا گیا تھا کہ وہ ان کے لئے دعائے مغفرت کریں جبکہ وہ ان کو گالیاں دیا کرتے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3761]