سیدنا ابوجبیرہ بن ضحاک رضی اللہ عنہ اس آیت: وَ لَا تَنَابَزُوْا بِالْاَلْقَابِ) (الحجرات: 11) ” اور ایک دوسرے کے برے نام نہ رکھو۔“ کے متعلق فرماتے ہیں: زمانہ جاہلیت میں لوگوں کے القاب ہوا کرتے تھے۔ نبی اکرم صلی اللہ علیہ وسلم نے ایک آدمی کو اس کے لقب سے پکارا۔ آپ سے کہا گیا: یا رسول اللہ صلی اللہ علیہ وسلم وہ آدمی اس لقب کو ناپسند کرتا ہے تو اللہ تعالیٰ نے یہ آیت نازل فرما دی: وَ لَا تَنَابَزُوْا بِالْاَلْقَابِ) (الحجرات: 11) یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3766]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: اللہ تعالیٰ قیامت کے دن فرمائے گا: میں نے تمہیں حکم دیا تھا لیکن میں نے جو عہد تم سے لیا تھا تم نے اسے ضائع کر دیا اور میں نے تمہارے نسبوں کو بلند کیا تھا جبکہ آج میں اپنی نسبت کو بلند کروں گا اور تمہارے نسب پست کر دوں گا۔ کہاں ہیں پرہیزگار؟ کہاں ہیں پرہیزگار؟ بے شک اللہ کی بارگاہ میں سب سے زیادہ عزت والا وہ ہے جو سب سے زیادہ پرہیزگار ہے۔ ٭٭ یہ حدیث عالی ہے غریب المتن و الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ طلحہ بن عمرو کے ذریعے عطاء بن ابی رباح کے واسطے سے سیدنا ابوہریرہ رضی اللہ عنہ سے مروی درج ذیل حدیث مذکورہ حدیث کی شاہد ہے۔ [المستدرك على الصحيحين/كِتَابُ التَّفْسِيرِ/حدیث: 3767]

سیدنا ابوہریرہ رضی اللہ عنہ نے اس آیت کی تلاوت کی: اِنَّ اَکْرَمَکُمْ عِنْدَ اللّٰہِ اَتْقٰکُمْ (الحجرات: 13) ” بیشک اللہ کے یہاں تم میں زیادہ عزت والا وہ ہے جو تم میں زیادہ پرہیزگار ہے۔“ پھر فرمایا: اللہ تعالیٰ قیامت کے دن فرمائے گا: اے لوگو! میں نے نسب بنایا اور تم نے بھی نسب بنایا، میں تم میں زیادہ عزت والا، زیادہ پرہیزگار کو بنایا جبکہ تم نے انکار کیا۔ تم کہتے ہو فلاں بن فلاں، فلاں بن فلاں سے زیادہ عزت والا ہے اور میں آج اپنی نسبت کو اونچا کروں گا اور تمہارے نسب پست کروں گا۔ کہاں ہیں پرہیزگار، کہاں ہیں پرہیزگار۔ سیدنا طلحہ رحمۃ اللہ علیہ کہتے ہیں: مجھے عطاء نے کہا: اے طلحہ قیامت کے دن تیرے اور میرے ہم نام کتنے ہی لوگ ہوں گے لیکن جب ان کو پکارا جائے گا تو صرف وہی اٹھے گا جس کا بلانا مقصود ہو گا۔ [المستدرك على الصحيحين/كِتَابُ التَّفْسِيرِ/حدیث: 3768]