سیدنا ابوامامہ رحمۃ اللہ علیہ فرماتے ہیں: صحابہ کرام رضوان اللہ علیہم اجمعین کہا کرتے تھے: اللہ تعالیٰ ہمیں دیہاتیوں اور ان کے مسائل کی وجہ سے فائدہ دیتا ہے۔ ایک دن ایک دیہاتی آیا اور بولا: یا رسول اللہ صلی اللہ علیہ وسلم ! اللہ تعالیٰ نے قرآن کریم میں تکلیف رساں درخت کا ذکر کیا ہے اور میں نہیں سمجھتا کہ جنت میں کوئی ایسا درخت ہو گا جس سے کسی جنتی کو نقصان ہو۔ رسول اللہ صلی اللہ علیہ وسلم نے پوچھا: وہ کون سا درخت ہے؟ اس نے کہا:” بیری “ کیونکہ اس میں کانٹے ہوتے ہیں۔ رسول اللہ صلی اللہ علیہ وسلم نے فرمایا: ”فِیْ سِدْرٍ مَّخْضُوْدٍ“ ” بے کانٹوں کی بیریوں میں۔“ اللہ تعالیٰ اس سے کانٹے صاف کر دے گا اور ہر کانٹے کی جگہ اللہ تعالیٰ پھل لگا دے گا۔ وہاں ایسے پھل اگیں گے جو ایک پھل کو پھاڑ کر پیدا ہوں گے۔ علاوہ ازیں ان میں بہتر رنگ ہوں گے، ان میں سے کوئی ایک رنگ بھی دوسرے سے ملتا جلتا نہیں ہو گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3820]

سیدنا عبداللہ بن عباس رضی اللہ عنہما: وَّ ظِلٍّ مِّنْ یَّحْمُوْمٍ ” اور جلتے ہوئے دھوئیں کے سائے میں۔“ کے بارے میں فرماتے ہیں (اس سے مراد) کالے دھوئیں کے سائے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3821]