سیدنا عبداللہ بن عمر رضی اللہ عنہما فرماتے ہیں: جب رسول اللہ صلی اللہ علیہ وسلم مدینہ منورہ تشریف لے آئے تو آپ صلی اللہ علیہ وسلم نے اپنے صحابہ رضوان اللہ علیہم اجمعین کو ایک دوسرے کا بھائی بھائی بنا دیا۔ تو سیدنا علی رضی اللہ عنہ روتے ہوئے حاضر بارگاہ مصطفی ہوئے اور کہنے لگے: یا رسول اللہ صلی اللہ علیہ وسلم آپ نے تمام صحابہ کے درمیان مواخاۃ قائم فرما دی ہے، لیکن مجھے کسی کا بھائی نہیں بنایا۔ تو رسول اللہ صلی اللہ علیہ وسلم نے ارشاد فرمایا: اے علی رضی اللہ عنہ! تو دنیا اور آخرت میں میرا بھائی ہے۔ ٭٭ یہ حدیث جمیع بن عمیر سے روایت کرنے میں سالم بن ابوحفصہ نے حکیم بن جبیر کی متابعت کی ہے اور سند میں کچھ اضافہ ہے۔ [المستدرك على الصحيحين/كِتَابُ الْهِجْرَةِ/حدیث: 4334]

سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم نے اپنے اصحاب کو ایک دوسرے کا بھائی بھائی بنا دیا۔ سیدنا ابوبکر رضی اللہ عنہ کو سیدنا طلحہ رضی اللہ عنہ کا بھائی بنایا، سیدنا عمر رضی اللہ عنہ کو سیدنا زبیر رضی اللہ عنہ کا بھائی بنایا، سیدنا عثمان رضی اللہ عنہ کو سیدنا عبدالرحمن بن عوف رضی اللہ عنہ کا بھائی بنایا، سیدنا علی رضی اللہ عنہ نے عرض کی: یا رسول اللہ صلی اللہ علیہ وسلم ! آپ نے تمام صحابہ کو بھائی بھائی بنا دیا، میرا بھائی کون ہے؟ رسول اللہ صلی اللہ علیہ وسلم نے فرمایا: اے علی! کیا تم اس بات پر راضی نہیں ہو کہ تمہارا بھائی ” میں “ ہوں؟ (سیدنا عبداللہ بن عمر رضی اللہ عنہما فرماتے ہیں: سیدنا علی رضی اللہ عنہ بہت طاقتور اور دلیر آدمی تھے۔) سیدنا علی رضی اللہ عنہ نے کہا: جی ہاں یا رسول اللہ صلی اللہ علیہ وسلم ! تو رسول اللہ صلی اللہ علیہ وسلم نے فرمایا: تو دنیا اور آخرت میں میرا بھائی ہے۔ [المستدرك على الصحيحين/كِتَابُ الْهِجْرَةِ/حدیث: 4335]