سیدنا زید بن وھب فرماتے ہیں: سیدنا علی رضی اللہ عنہ کے پاس اہل بصرہ کا ایک وفد آیا۔ ان میں ایک خارجی آدمی بھی تھا جس کا نام ” جعد بن نعجہ “ تھا، اس نے اللہ تعالیٰ کی حمد اور رسول اللہ صلی اللہ علیہ وسلم پر درود شریف پڑھا پھر کہنے لگا: اے علی! خدا کا خوف کرو، کیونکہ تم نے بھی آخر مرنا ہے۔ سیدنا علی رضی اللہ عنہ نے فرمایا: جی نہیں۔ (میں طبعی موت نہیں مروں گا بلکہ) مجھے شہید کیا جائے گا اور (اپنے سر مبارک اور داڑھی شریف کی طرف اشارہ کرتے ہوئے فرمایا) ایک حملے میں میری یہ داڑھی رنگین ہو جائے گی۔ یہ فیصلہ ہو چکا ہے، وعدہ لیا جا چکا ہے، اور بے شک نامراد رہا جس نے جھوٹ بولا، پھر اس نے سیدنا علی رضی اللہ عنہ کے لباس کے متعلق اعتراض کیا، کہنے لگا: آپ کو اس سے اچھا لباس پہننا چاہئے تھا، آپ نے فرمایا: میرا یہ لباس مجھے تکبر سے دور رکھتا ہے اور مسلمانوں کو میرے اس عمل کی پیروی کرنی چاہئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4738]

حریث بن مخشی بیان کرتے ہیں کہ سیدنا علی رضی اللہ عنہ کو 21 رمضان المبارک کی نماز فجر میں شہید کیا گیا، آپ فرماتے ہیں میں نے سیدنا حسن بن علی رضی اللہ عنہما کا ایک خطبہ سنا ہے اس میں انہوں نے سیدنا علی رضی اللہ عنہ کے کافی فضائل بیان کئے اور فرمایا: ان کو جس رات شہید کیا گیا یہ وہی رات تھی جس میں قرآن نازل ہوا، اسی رات میں سیدنا عیسیٰ علیہ السلام کو اللہ کی بارگاہ میں اٹھایا گیا، اسی رات سیدنا موسیٰ علیہ السلام کا انتقال ہوا، (حریث بن مخشی) کہتے ہیں: سیدنا حسن بن علی رضی اللہ عنہ نے ان کی نماز جنازہ پڑھائی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4739]