عبدالرحمن بن ابی لیلیٰ سے مروی ہے کہ میری ملاقات کعب بن عجرہ رضی اللہ عنہ سے ہوئی، انہوں نے فرمایا: ”کیا میں تمہیں وہ تحفہ نہ دوں جو میں نے نبی کریم صلی اللہ علیہ وسلم سے سنا ہے؟“ میں نے کہا: کیوں نہیں، مجھے وہ تحفہ ضرور دیں۔ انہوں نے فرمایا: ہم نے رسول اللہ صلی اللہ علیہ وسلم سے دریافت کیا کہ اے اللہ کے رسول! آپ یعنی اہل بیت پر درود و سلام بھیجنے کا طریقہ کیا ہے؟ آپ صلی اللہ علیہ وسلم نے فرمایا: ”یوں کہو: «اللَّهُمَّ صَلِّ عَلَى مُحَمَّدٍ، وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ، وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ، اللَّهُمَّ بَارِكْ عَلَى مُحَمَّدٍ، وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيمَ، وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ» ”اے اللہ! رحمت نازل فرما محمد صلی اللہ علیہ وسلم پر اور آلِ محمد صلی اللہ علیہ وسلم پر، جیسے تو نے رحمت نازل فرمائی ابراہیم علیہ السلام پر اور آلِ ابراہیم علیہ السلام پر، بے شک تو قابلِ تعریف اور بڑی شان والا ہے، اے اللہ! برکت نازل فرما محمد صلی اللہ علیہ وسلم پر اور آلِ محمد صلی اللہ علیہ وسلم پر، جیسے تو نے برکت نازل فرمائی ابراہیم علیہ السلام پر اور آلِ ابراہیم علیہ السلام پر، بے شک تو قابلِ تعریف اور بڑی شان والا ہے۔““
امام حاکم فرماتے ہیں: امام محمد بن اسماعیل بخاری نے اس حدیث کو انہی اسناد اور الفاظ کے ساتھ حرف بہ حرف اپنی ”جامع صحیح“ میں روایت کیا ہے، میں نے اسے یہاں اس لیے نقل کیا تاکہ علم حاصل کرنے والوں کو معلوم ہو جائے کہ اہل بیت اور آل درحقیقت ایک ہی ہیں۔ اور ابوفروہ یعنی عروہ بن حارث ہمدانی کوفہ کے ثقہ ترین تابعین میں سے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4761]