امام زہری رحمہ اللہ سے روایت ہے کہ رسول اللہ صلی اللہ علیہ وسلم نے سب سے پہلے جس خاتون سے نکاح کیا وہ سیدہ خدیجہ بنت خویلد بن اسد بن عبدالعزیٰ تھیں، آپ صلی اللہ علیہ وسلم نے ان سے جاہلیت کے دور میں نکاح کیا اور ان کے والد خویلد بن اسد نے ان کا نکاح پڑھایا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4895]

داؤد بن محمد بن ابی معشر اپنے والد اور وہ اپنے دادا سے روایت کرتے ہیں کہ سیدہ خدیجہ رضی اللہ عنہا کی وفات ہجرت سے ایک سال قبل ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4896]

محمد بن اسحاق سے روایت ہے کہ ابوطالب اور خدیجہ بنت خویلد رضی اللہ عنہا کا انتقال ایک ہی سال ہوا، اور یہ نبی کریم صلی اللہ علیہ وسلم کی مدینہ ہجرت سے تین سال پہلے کا واقعہ ہے، سیدہ خدیجہ رضی اللہ عنہا کو حجون (کے قبرستان) میں دفن کیا گیا اور رسول اللہ صلی اللہ علیہ وسلم خود ان کی قبر میں اترے، جس وقت آپ صلی اللہ علیہ وسلم نے ان سے نکاح کیا ان کی عمر 28 سال تھی، محمد بن اسحاق کہتے ہیں کہ سیدہ خدیجہ کی کنیت امِ ہند تھی، رسول اللہ صلی اللہ علیہ وسلم سے نکاح کے وقت ان کا ایک بیٹا اور ایک بیٹی تھی، خدیجہ کی والدہ کا نام فاطمہ بنت زائدہ بن اصم تھا اور ان کی والدہ ہالہ بنت عبدمناف تھیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4897]