0 [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5313]

سیدنا مکحول رضی اللہ عنہ فرماتے ہیں: سیدنا بلال رضی اللہ عنہ کا رنگ کالا تھا، جسامت کمزور، قد لمبا، جھکے ہوئے، ان کے بال بہت گھنے تھے، گال سکڑے ہوئے، سر کے کافی بال سفید تھے لیکن پورا سر سفید نہیں ہوا تھا۔ سیدنا بلال رضی اللہ عنہ جنگ بدر، احد، خندق اور تمام غزوات میں رسول اللہ صلی اللہ علیہ وسلم کے ہمراہ شریک ہوئے۔ رسول اللہ صلی اللہ علیہ وسلم نے ان کو سیدنا عبیدہ بن حارث بن عبدالمطلب کا بھائی بنایا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5314]

حسین حنفی کہتے ہیں: بلال بن رباح ابوعمرو ہیں، سیدنا بلال رضی اللہ عنہ کی والدہ کا نام حمامہ تھا۔ سیدنا بلال رضی اللہ عنہ کی عمر 67 برس تھی۔ اور دمشق کے قبرستان کے چھوٹے گیٹ کے قریب ان کو دفن کیا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5315]

محمد بن اسحاق کہتے ہیں: ابوبکر نے امیہ بن خلف سے بلال کو خریدا۔ سیدنا بلال رضی اللہ عنہ غزوہ بدر میں رسول اللہ صلی اللہ علیہ وسلم کے ہمراہ شریک ہوئے تھے، ان کا رنگ پیدائشی طور پر کالا تھا۔ سیدنا ابوبکر رضی اللہ عنہ نے ان کو امیہ بن خلف سے خریدا، ان کے بدلے میں انہوں نے امیہ بن خلف کو ایک غلام دیا تھا۔ سیدنا بلال رضی اللہ عنہ کی والدہ کا نام ” حمامہ “ ہے۔ یہ دونوں ہی مسلمان ہو گئے تھے، سیدنا بلال رضی اللہ عنہ کی کنیت ابوعبداللہ تھی۔ 20 ہجری کو دمشق میں ان کا انتقال ہوا۔ بعض مؤرخین نے کہا ہے کہ 18 ہجری کو ان کا انتقال ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5316]

قیس بن مدرک بن عوف احمسی کہتے ہیں: میں سیدنا بلال رضی اللہ عنہ کے پاس سے گزرا، اس وقت وہ مسجد میں بیٹھے ہوئے تھے، میں نے ان سے کہا: اے ابوعبداللہ! تم یہاں کیوں بیٹھے ہو؟ تو انہوں نے جواب دیا: سورج کے طلوع ہونے کا انتظار کر رہا ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5317]

محمد بن اسماعیل کہتے ہیں: بلال بن رباح ابوعبدالکریم۔ ان کو ابوعبداللہ بھی کہا جاتا ہے، اور بعض لوگوں نے کہا کہ ان کی کنیت ابوعمرو تھی۔ آپ سیدنا ابوکر رضی اللہ عنہ کے آزاد کردہ غلام تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5318]