عمرو بن میمون کہتے ہیں: سیدنا بلال رضی اللہ عنہ کا بھائی عرب کی جانب منسوب ہوتا تھا اور سمجھتا تھا کہ وہ عربی ہے۔ انہوں نے ایک عربی لڑکی کو پیغام نکاح بھیجا، تو لوگ کہنے لگے: اگر بلال آ کر تمہاری ذمہ داری لے لے تو ہم اس لڑکی کے ساتھ تمہارا نکاح کر دیں گے۔ پھر سیدنا بلال رضی اللہ عنہ وہاں آئے اور کہا: کہ میں ہوں بلال بن رباح رضی اللہ عنہ، اور یہ میرا بھائی ہے۔ بہت بدمزاج اور بد دین ہے، تمہاری مرضی ہو تو اس سے اپنی لڑکی کا نکاح کر دو، نہیں کرنا چاہتے تو بھی تمہاری مرضی۔ انہوں نے کہا: جس کے تم بھائی ہو ہم اپنی لڑکی کا اس کے ساتھ نکاح کریں گے۔ چنانچہ انہوں نے ان کے بھائی کا نکاح کر دیا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ سیدنا بلال رضی اللہ عنہ کے بھائی کی یہ روایت ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5320]

سیدنا عبداللہ فرماتے ہیں: سب سے پہلے جن لوگوں نے اسلام ظاہر کیا وہ سات آدمی ہیں۔ ان میں سے رسول اللہ صلی اللہ علیہ وسلم کا دفاع ان کے چچا ابوطالب نے کیا۔ سیدنا ابوبکر رضی اللہ عنہ کا دفاع ان کی قوم نے کیا۔ ان کے علاوہ جتنے بھی لوگ تھے ان کو مشرکین نے پکڑ کر لوہے کی زنجیروں میں جکڑ کر سخت دھوپ میں ڈال دیا، ان میں سے ہر شخص نے اپنی ہمت کے مطابق اپنا دفاع کیا سوائے سیدنا بلال رضی اللہ عنہ کے، کہ انہوں نے اپنے آپ کو اللہ کی بارگاہ میں مسکین بنا لیا اور لوگوں کے سامنے بھی مسکین بن کر رہے۔ لوگوں نے ان کو بچوں کے سپرد کر دیا وہ ان کو مکہ کی گلی کوچوں میں گھماتے رہتے۔ اور سیدنا بلال رضی اللہ عنہ ” احد، احد “ کی صدائیں بلند کرتے رہتے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5321]