محمد بن عمر اپنے اساتذہ کے حوالے سے بیان کرتے ہیں کہ ابوتیہان کا نام مالک بن عمرو بن حاف بن قضاعہ ہے۔ یہ بنی عبداشہل کے حلیف تھے۔ اور (محمد بن عمرو نے یہ بھی) کہا ہے کہ ابوہیثم بن تیہان اور اسعد بن زرارہ ان لوگوں میں سے ہیں جو پہلے پہل مکہ میں اسلام لائے تھے، اور جو اپنی قوم میں سب سے پہلے رسول اللہ صلی اللہ علیہ وسلم سے ملے تھے اسی طرح وہ مدینہ میں (اپنی قوم سے پہلے) آئے۔ اور ابوہیثم رضی اللہ عنہ انصار میں سے مسلمانوں کے ساتھ عقبہ میں شریک ہوئے، اور یہ بارہ مبلغین میں سے ایک تھے۔ اور اس بارے میں کوئی اختلاف بھی نہیں ہے۔ اور رسول اللہ صلی اللہ علیہ وسلم نے ابوہیثم بن تیہان رضی اللہ عنہ اور سیدنا عثمان بن مظعون رضی اللہ عنہ کو ایک دوسرے کا بھائی بھائی بنایا۔ سیدنا ابوہیثم رضی اللہ عنہ جنگ بدر، جنگ احد، جنگ خندق اور تمام غزوات میں رسول اللہ صلی اللہ علیہ وسلم کے ہمراہ شریک ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5333]

صالح بن کیسان کہتے ہیں: سیدنا ابوہیثم بن تیہان رضی اللہ عنہ سیدنا عمر بن خطاب رضی اللہ عنہ کے دور خلافت میں مدینہ میں فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5333M1]

سیدنا ابراہیم بن اسماعیل بن ابی حیہ فرماتے ہیں: میں نے بنی عبدالاشہل کے بزرگوں کو یہ کہتے ہوئے سنا ہے کہ ابوہیثم بن تیہان 20 ہجری کو مدینہ منورہ میں فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5333M2]