محمد بن عمر فرماتے ہیں: سیدنا خالد بن ولید رضی اللہ عنہ 21 ہجری کو حمص میں فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5370]

محمد بن عبدالله بن نمیر نے ان کا نسب یوں بیان کیا ہے ”خالد بن ولید بن مغیرہ بن عبدالله بن عمر بن مخزوم“ ان کی والدہ لبابہ بنت حارث بن حزن ہلالیہ ہیں، یہ ام المومنین سیدہ میمونہ بنت حارث رضی اللہ عنہا کی بہن ہیں۔ سیدنا خالد رضی اللہ عنہ کی کنیت ابوسلیمان تھی۔ سیدنا عمر رضی اللہ عنہ نے ان کو مقام رہا، حران، رتہ اور آمد کا گورنر بنایا تھا۔ آپ نے ایک سال تو کام کیا لیکن اس کے بعد انہوں نے استعفاء دے دیا تھا، سیدنا عمر رضی اللہ عنہ نے ان کا استعفاء منظور کر لیا، اس کے بعد آپ مدینہ منورہ میں آ گئے اور وقات تک اپنے گھر میں ہی قیام کیا، ان کی وفات 22 ہجری کو ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5371]

سیدنا یحیی بن بکیر فرماتے ہیں: سیدنا خالد بن ولید رضی اللہ عنہ کی کنیت ابوسلیمان تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5372]

سیدنا ابووائل فرماتے ہیں: سیدنا عمر رضی اللہ عنہ سے کسی نے کہا کہ بنی مغیرہ کی بہت ساری عورتیں سیدنا خالد بن ولید رضی اللہ عنہ کے گھر میں جمع ہو کر رو رہی ہیں، اور ہم پسند نہیں کرتے کہ ان کے اس رویے سے آپ کو تکلیف ہو، اگر ہو سکے تو آپ ان کو منع فرما دیں، سیدنا عمر رضی اللہ عنہ نے فرمایا: یہ رو رو کر ٹب بھی بھر دیں تب بھی کوئی حرج نہیں ہے، گناہ تو تب ہے جب منہ پر تھپڑ ماریں یا چیخ و پکار اور بین کریں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5373]