ایک دوسری سند کے ہمراہ بھی سیدنا ابوموسیٰ کا بیان ہے کہ علاء بن حضرمی رضی اللہ عنہ نے بحرین سے رسول اللہ صلی اللہ علیہ وسلم کی بارگاہ میں مال بھیجا، اس کے بعد مذکورہ حدیث کی طرح حدیث بیان کی۔ ٭٭ یہ حدیث امام مسلم رحمۃ اللہ علیہ کے معیار کے مطابق ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5511]

ابوجعفر محمد بن علی بن حسین اپنے والد کا یہ بیان نقل کرتے ہیں کہ عباس بن عبدالمطلب رضی اللہ عنہ رسول اللہ صلی اللہ علیہ وسلم کے پاس آئے، اس وقت ان کے اوپر ایک جبہ تھا، ان کے سفید بالوں کی دو مینڈھیاں تھیں۔ رسول اللہ صلی اللہ علیہ وسلم نے ان کو دیکھا تو مسکرا دیئے۔ سیدنا عباس رضی اللہ عنہ نے پوچھا: اللہ تعالیٰ آپ کو ہمیشہ خوش رکھے، آپ کس وجہ سے مسکرائے ہیں؟ رسول اللہ صلی اللہ علیہ وسلم نے فرمایا: نبی علیہ السلام کے چچا کے حسن و جمال پر مسکرایا ہوں۔ سیدنا عباس رضی اللہ عنہ نے پوچھا: یا رسول اللہ صلی اللہ علیہ وسلم مردوں کا حسن و جمال کس چیز میں ہوتا ہے؟ تو آپ صلی اللہ علیہ وسلم نے فرمایا: زبان میں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5512]

سیدنا جابر رضی اللہ عنہ فرماتے ہیں: سیدنا عباس رضی اللہ عنہ مدینہ میں تھے، انصار نے ایسا قمیص بہت ڈھونڈا جو ان کے جسم پر پورا آئے لیکن سوائے عبداللہ بن ابی (منافق) کے قمیص کے اور کوئی نہ ملا، لوگوں نے وہی قمیص سیدنا عباس رضی اللہ عنہ کو پہنا دیا۔ سیدنا جابر رضی اللہ عنہ فرماتے ہیں: سیدنا عباس رضی اللہ عنہ جنگ بدر میں رسول اللہ صلی اللہ علیہ وسلم کے قیدی بنے تھے، ان کو زبردستی جنگ میں لایا گیا تھا، پھر گرفتار کر کے ان کو مدینہ شریف میں لایا گیا اور عبداللہ بن ابی (منافق) نے ان کو اپنا قمیص پہنایا تھا۔ اس کے اسی عمل کا بدلہ دینے کے لئے رسول اللہ صلی اللہ علیہ وسلم نے عبداللہ بن ابی (منافق) کے کفن کے لئے اپنا قمیص دیا تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5513]