سیدنا عبداللہ فرماتے ہیں: میں سیدنا مقداد کی جگہ ایک جنگ میں شریک ہوا، اس کے بدلے میں مال غنیمت لینے کی بجائے مجھے یہ بات زیادہ عزیز ہے کہ میں مقداد کا ساتھی بنوں، کیونکہ ایک مرتبہ وہ رسول اللہ صلی اللہ علیہ وسلم کی بارگاہ میں آئے، اس وقت نبی اکرم صلی اللہ علیہ وسلم مشرکوں کے خلاف دعا کر رہے تھے تو انہوں نے عرض کی: یا رسول اللہ صلی اللہ علیہ وسلم خدا کی قسم! ہم موسیٰ علیہ السلام کی قوم کی طرح آپ کو یہ نہیں کہیں گے کہ اے موسیٰ آپ اور آپ کا رب جا کر لڑیں ہم تو یہاں بیٹھے ہیں۔ بلکہ ہم تو آپ کے دائیں بائیں اور آگے پیچھے آپ پر اپنی جان نچھاور کریں گے، میں نے دیکھا کہ یہ بات سن کر رسول اللہ صلی اللہ علیہ وسلم کا چہرہ انور چمک اٹھا اور آپ صلی اللہ علیہ وسلم بہت خوش ہوئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5577]

ابوراشد حرانی فرماتے ہیں: میں نے رسول اللہ صلی اللہ علیہ وسلم کے محافظ سیدنا مقداد بن اسود رضی اللہ عنہ کو دیکھا وہ مقام حمص میں ایک تجارتی تابوت پر بیٹھے ہوئے تھے بڑھاپے کی وجہ سے تابوت پر سوار ہو گئے اور جہاد میں شرکت کا ارادہ کئے ہوئے تھے۔ میں نے ان سے کہا: اللہ تعالیٰ نے آپ کے بڑھاپے کی وجہ سے آپ کے عذر کو قبول کیا ہے (آپ پھر کیوں جہاد پر جا رہے ہیں؟) انہوں نے جواباً کہا: سورۃ توبہ کی اس آیت نے مجھے جہاد پر نکلنے پر مجبور کر دیا ہے۔ ﴿اِنفِرُوْا خِفَافًا وَّثِقَالاً﴾ (التوبۃ: 41) ” کوچ کرو ہلکی جان سے چاہے بھاری دل سے “ سیدنا بقیہ فرماتے ہیں: سورۃ توبہ کو سورت بحوث بھی کہا جاتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔" (امام حاکم فرماتے ہیں) میں نے سیدنا ابوبکر صدیق رضی اللہ عنہ کے مناقب میں سیدنا عبداللہ بن مسعود رضی اللہ عنہ سے مروی یہ حدیث پاک نقل کی ہے کہ سب سے پہلے اسلام ظاہر کرنے والے سات افراد تھے۔ رسول اللہ صلی اللہ علیہ وسلم ، سیدنا ابوبکر رضی اللہ عنہ، سیدنا عمار رضی اللہ عنہ، سیدنا عمار رضی اللہ عنہ کی والدہ سیدنا سمیہ رضی اللہ عنہا، سیدنا صہیب رضی اللہ عنہ، سیدنا مقداد رضی اللہ عنہ اور سیدنا بلال رضی اللہ عنہ۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5578]