حفص بن خالد فرماتے ہیں: مجھے اس بزرگ نے یہ حدیث بیان کی ہے جو کہ مقام موصل سے ہمارے پاس آئے تھے، وہ فرماتے ہیں کہ میں نے سیدنا زبیر بن عوام رضی اللہ عنہ کے ساتھ کچھ سفر کئے ہیں، ایک دفعہ کا ذکر ہے کہ ایک صحراء میں ان کو غسل کی حاجت ہو گئی، انہوں نے مجھ سے کہا: میرے لئے پردہ کرو، میں نے ان کے لئے کپڑے سے پردہ کیا، وہ غسل کرنے لگ گئے، اچانک میری نگاہ ان کے جسم پر پڑ گئی، میں نے دیکھا کہ ان کا سارا جسم تلواروں کے زخموں کے نشانات سے چھلنی تھا۔ میں نے ان سے کہا: خدا کی قسم! میں نے آپ کے جسم پر زخموں کے ایسے نشانات دیکھے ہیں جو آج سے پہلے میں نے کبھی کسی کے جسم پر نہیں دیکھے، انہوں نے جواباً کہا: کیا تم نے میرے جسم کے زخموں کے نشانات دیکھ لئے ہیں؟ پھر فرمایا: خدا کی قسم! یہ تمام زخم مجھے رسول اللہ صلی اللہ علیہ وسلم کی ہمراہی میں جنگ کرتے ہوئے آئے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5649]