ابوحسن مولیٰ بنی نوفل نے سیدنا ابن عباس رضی اللہ عنہ سے پوچھا کہ ”غلام جس کی زوجیت میں کوئی لونڈی ہو، وہ اسے دو طلاقیں دے دے، پھر وہ دونوں اس کے بعد آزاد ہو جائیں تو کیا اس آزاد غلام کے لیے روا ہے کہ وہ اس (اپنی پہلے والی بیوی، یعنی اس آزاد لونڈی) کو شادی کا پیغام دے؟“ انہوں نے کہا: ”ہاں، رسول اللہ صلی اللہ علیہ وسلم نے اسی طرح فیصلہ فرمایا تھا۔“ [سنن ابي داود/كتاب تفريع أبواب الطلاق /حدیث: 2187]

جناب علی (علی بن مبارک) نے اپنی سند سے مذکورہ بالا حدیث کی مانند بیان کیا مگر «حَدَّثَنِي» کا صیغہ استعمال نہیں کیا (بلکہ «عَنْ» کہا)۔ سیدنا ابن عباس رضی اللہ عنہما نے کہا: ”تیرے لیے ایک ہی (طلاق) بچ گئی ہے۔“ رسول اللہ صلی اللہ علیہ وسلم نے یہی فیصلہ کیا تھا۔ امام ابوداؤد رحمہ اللہ بیان کرتے ہیں کہ میں نے امام احمد بن حنبل رحمہ اللہ کو سنا، انہوں نے کہا: ”عبدالرزاق نے بیان کیا کہ ابن مبارک نے معمر سے پوچھا یہ ابوالحسن کون ہے؟ اس نے بہت بڑا بھاری پتھر اٹھایا ہے (یہ عدم اعتماد کا اظہار ہے)۔“ امام ابوداؤد رحمہ اللہ کہتے ہیں کہ ”یہ ابوالحسن وہی ہے جس سے زہری روایت کرتے ہیں۔ زہری کہتے ہیں کہ یہ فقہاء میں سے تھا اور زہری نے اس سے کئی احادیث روایت کی ہیں۔“ امام ابوداؤد رحمہ اللہ نے کہا: ”ابوالحسن معروف ہے مگر اس حدیث پر عمل نہیں ہے۔“ [سنن ابي داود/كتاب تفريع أبواب الطلاق /حدیث: 2188]

ام المؤمنین سیدہ عائشہ رضی اللہ عنہا نبی کریم صلی اللہ علیہ وسلم سے بیان کرتی ہیں کہ آپ صلی اللہ علیہ وسلم نے فرمایا: ”لونڈی کے لیے دو طلاقیں ہیں اور اس کے «قُرْءٌ» (عدت) دو حیض ہیں۔“ [سنن ابي داود/كتاب تفريع أبواب الطلاق /حدیث: 2189]