ہرم بن حیان عبدی کہتے ہیں: میں کوفہ میں گیا، اور وہاں جانے کا میرا واحد یہی مقصد تھا کہ میں سیدنا اویس قرنی رضی اللہ عنہ سے ملاقات کروں اور ان سے کچھ باتیں پوچھوں۔ (ان کو ڈھونڈتا رہا) حتیٰ کہ نہر فرات کے کنارے پر دوپہر کے وقت وہ اکیلے بیٹھے اپنے کپڑے دھو رہے تھے اور وضو کر رہے تھے، میں نے ان کی نشانیوں کی وجہ سے ان کو پہچان لیا۔ میں نے ان کو دیکھا، وہ بھرے ہوئے جسم والے گندم گوں شخص تھے۔ ان کے سر پر کثیر بال تھے لیکن وہ سر منڈوا کر رکھتے تھے، یعنی وہ چٹیا نہیں رکھتے تھے، داڑھی گھنی تھی، اون کا بنا ہوا لباس پہنتے تھے اور اون کی بنی ہوئی ایک چادر بھی ہوتی تھی، موزے نہیں پہنتے تھے، چہرہ بھاری اور رعب دار تھا، میں نے اس کو سلام کیا، انہوں نے میرے سلام کا جواب دیتے ہوئے میری جانب دیکھا، اور مجھے خوش آمدید کہتے ہوئے بولے: تم کون ہو؟ میں نے ان سے مصافحہ کرنے کے لئے اپنا ہاتھ آگے بڑھایا، لیکن انہوں نے میرے ساتھ مصافحہ کرنے سے انکار کر دیا۔ اور مجھے دعا دیتے ہوئے اپنی جگہ پر کھڑے رہنے کا کہا۔ میں نے کہا: اے اویس! اللہ تعالیٰ آپ پر رحم فرمائے، اور اللہ تعالیٰ آپ کی مغفرت فرمائے، آپ کا کیا حال ہے؟ اس کے بعد اس محبت نے مجھ پر شدید غلبہ کر لیا جو میرے دل میں سیدنا اویس رضی اللہ عنہ کے بارے میں موجود تھی، اور جب میں نے ان کی حالت زار دیکھی تو مجھ پر ایک رقت طاری ہو گئی۔ ان کی حالت پر مجھے رونا آ گیا، اور میرے ساتھ ساتھ وہ بھی رو دئیے۔ سیدنا اویس رضی اللہ عنہ نے مجھے کہا: اے ہرم بن حیان تمہارا کیا حال ہے؟ اور تمہیں میرے بارے میں کس نے بتایا؟ میں نے کہا: اللہ تعالیٰ نے، اس کے سوا کوئی عبادت کے لائق نہیں ہے، ہمارا رب پاک ہے، ہمارے رب کا وعدہ پورا ہو کر رہتا ہے، اس دن سے پہلے نہ تو انہوں نے مجھے دیکھا تھا اور نہ میں نے ان کو دیکھا تو لیکن انہوں نے جب مجھے نام لے کر مخاطب کیا تو میں نے ان سے پوچھا: آپ مجھے کیسے جانتے ہیں اور میرے والد کے نام کا آپ کو کس نے بتایا؟ حالانکہ آج سے پہلے میری آپ کے ساتھ کبھی ملاقات نہیں ہوئی۔ انہوں نے کہا: مجھے علم اور خبر رکھنے والے اللہ تعالیٰ نے خبر دی ہے۔ جب تم نے میرے ساتھ بات کی تو میری روح نے تمہاری روح کو پہچان لیا۔ زندہ انسانوں کی طرح روح میں بھی عقل ہوتی ہے اور یہ بھی ایک دوسرے کو دیکھ کر پہچان لیتی ہیں، آپس میں گفتگو کرتی ہیں، اگرچہ ہمارے جسم ایک دوسرے سے ملاقات اور بات چیت نہ کریں اگرچہ بظاہر ایک دوسرے کو نہ پہچانتے ہوں۔ اگرچہ یہ الگ الگ شہروں میں الگ الگ مقامات پر رہتے ہوں، (پھر بھی جب ملتے ہیں تو ایک دوسرے کو پہچان لیتے ہیں) میں نے کہا: مجھے رسول اللہ صلی اللہ علیہ وسلم کی کوئی حدیث سنائیے جو میں آپ کے حوالے سے یاد رکھوں۔ انہوں نے کہا: رسول اللہ صلی اللہ علیہ وسلم کے ساتھ میری ملاقات نہیں ہوئی اور نہ ہی مجھے حضور صلی اللہ علیہ وسلم کی صحبت کی سعادت ملی، ہاں البتہ میں نے ایسے بہت سارے لوگوں کی زیارت کی ہے جنہوں نے رسول اللہ صلی اللہ علیہ وسلم کو دیکھا ہے۔ اور جیسے تم لوگوں نے ان سے احادیث سن رکھی ہیں اسی طرح میرے پاس بھی کسی صحابی سے سنی ہوئی احادیث موجود ہیں، لیکن میں اپنے آپ کو محدث، قاضی یا مفتی نہیں کہلوانا چاہتا۔ اے حرم بن حیان! دل تو اس طرح کے معاملات کی خواہش کرتا رہتا ہے۔ (ہرم بن حیان) کہتے ہیں: میں نے کہا: آپ میرے بھائی! آپ قرآن کریم کی کوئی آیت ہی پڑھ دیجئے، میں تم سے وہی سن لیتا ہوں۔ کیونکہ میں آپ سے اللہ تعالیٰ کی رضا کے لئے بہت زیادہ محبت کرتا ہوں، اور آپ میرے لئے دعا بھی فرمائیں اور مجھے کوئی وصیت بھی فرمائیں۔ وہ میرا ہاتھ پکڑ کر مجھے نہر فرات کے کنارے لے گئے اور اعوذ باللہ من الشیطان الرجیم بسم اللہ الرحمن الرحیم پڑھا، یہ پڑھتے ہوئے آپ سسکیاں لینے لگے اور پھر رو پڑے، پھر فرمایا: اللہ تعالیٰ کا قول سب سے برحق قول ہے، اس کی بات سب سے سچی بات ہے اور اس کا کلام سب سے اچھا کلام ہے، اس نے ارشاد فرمایا ہے: وَمَا خَلَقْنَا السَّمَاوَاتِ وَالْأَرْضَ وَمَا بَيْنَهُمَا لَاعِبِينَ مَا خَلَقْنَاهُمَا إِلَّا بِالْحَقِّ وَلَكِنَّ أَكْثَرَهُمْ لَا يَعْلَمُونَ إِنَّ يَوْمَ الْفَصْلِ مِيقَاتُهُمْ أَجْمَعِينَ يَوْمَ لَا يُغْنِي مَوْلًى عَنْ مَوْلًى شَيْئًا وَلَا هُمْ يُنْصَرُونَ إِلَّا مَنْ رَحِمَ اللَّهُ إِنَّهُ هُوَ الْعَزِيزُ الرَّحِيمُ (سورۃ الدخان، آیت 38، 39، 40، 41، 42) ” اور ہم نے نہ بنائے آسمان اور زمین اور جو کچھ ان کے درمیان ہے کھیل کے طور پر ہم نے انہیں نہ بنایا مگر حق کے ساتھ لیکن ان میں اکثر جانتے نہیں بیشک فیصلہ کا دن ان سب کی میعاد ہے جس دن کوئی دوست کسی دوست کے کچھ کام نہ آئے گا اور نہ ان کی مدد ہو گی مگر جس پر اللہ رحم کرے بیشک وہی عزت والا مہربان ہے “ یہ آیات پڑھنے کے بعد آپ پھر سسکیاں لینے لگے، کچھ دیر بعد خاموش ہو گئے، میں نے ان کو دیکھا تو مجھے لگا کہ شاید آپ بے ہوش ہو چکے ہیں، پھر انہوں نے فرمایا: اے ہرم بن حیان، تیرا والد فوت ہو گیا ہے اور عنقریب تم بھی فوت ہونے والے ہو، ابوحیان فوت ہو گئے ہیں، وہ یا تو جنتی ہیں یا دوزخی ہیں۔ اور اے ابن حیان! سیدنا آدم علیہ السلام اور سیدنا حوا رضی اللہ عنہا وفات پا گئے اے ابن حیان! اور سیدنا نوح علیہ السلام، سیدنا ابراہیم خلیل اللہ علیہ السلام وفات پا گئے، اے ابن حیان! سیدنا موسیٰ نجی الرحمن علیہ السلام اور سیدنا داؤد خلیفۃ الرحمن علیہ السلام بھی وفات پا گئے، اور محمد رسول اللہ صلی اللہ علیہ وسلم بھی وفات پا گئے، اے ابن حیان! خلیفۃ المسلمین سیدنا ابوبکر صدیق رضی اللہ عنہ بھی وفات پا گئے، اس کے بعد وہ سیدنا عمر رضی اللہ عنہ پر افسوس کرتے ہوئے کہنے لگے میرے بھائی اور دوست سیدنا عمر بن خطاب رضی اللہ عنہ بھی وفات پا گئے، ہائے عمر رضی اللہ عنہ، اللہ تعالیٰ تم پر رحمتیں نازل کرے، یہ ان دنوں کی بات ہے جبکہ سیدنا عمر رضی اللہ عنہ ابھی زندہ تھے اور یہ ان کی خلافت کے آخری ایام کا واقعہ ہے۔ میں نے سیدنا اویس رضی اللہ عنہ سے کہا: سیدنا عمر بن خطاب رضی اللہ عنہ تو ابھی زندہ ہیں۔ اگر تجھ میں ذرا بھی سمجھ ہوئی تو تم جان لو گے کہ میرے کہنے کا کیا مطلب تھا، حقیقت تو یہ ہے کہ تو اور میں بھی مردوں میں شمار ہیں۔ اور یہ سب ہو کر رہے گا۔ پھر انہوں نے رسول اللہ صلی اللہ علیہ وسلم کی ذات پر درود پاک پڑھا، اور اس کے بعد کافی ساری مختصر دعائیں مانگیں۔ پھر فرمایا: اے ابن حیان! میری طرف سے یہ تمہیں وصیت ہے کہ کتاب اللہ کو مضبوطی سے تھامو، اور صالحین سے ملاقات کرتے رہو، اور نبی اکرم صلی اللہ علیہ وسلم پر درود پڑھتے رہو، میں تمہیں اپنی اور تمہاری موت کی خبر دیتا ہوں، اس لئے تم پر لازم ہے کہ موت کو یاد رکھا کر، ایک لمحہ کو بھی اس کو اپنے سے جدا نہ کر اور جب تو لوٹ کر اپنے قبیلے میں جائے تو ان کو ڈر سنا اور اپنی پوری ملت کے لئے نصیحت کر، اور اپنی ذات کے لئے محنت کر، اور جماعت سے الگ ہونے سے اپنے آپ کو بچا (اگر تو جماعت سے الگ ہو گیا تو) دین سے دور ہو جائے گا، اور اس دوری کا تجھے پتہ بھی نہیں چلے گا اور تو قیامت کے دن دوزخ میں داخل ہو جائے گا۔ پھر انہوں نے کہا: اے اللہ! یہ شخص سمجھتا ہے کہ یہ تیری رضا کی خاطر مجھ سے محبت کرتا ہے، اور یہ صرف تیری رضا کی خاطر میری ملاقات کے لئے آیا ہے یا اللہ جنت میں مجھے اس کے چہرے کی پہچان کرانا، اور وہاں پر اس کی میرے ساتھ ملاقات کروانا، جب تک اس کی زندگی ہے، اس کی حفاظت فرما، اور اس کو اس کی جائیداد عطا فرما، اور اس کو دنیا کی تھوڑی نعمت پر راضی ہونے والا بنا، اے اللہ تو اس کو دنیا کا جتنا حصہ عطا فرمائے وہ اس کے لئے آسان فرما، اور جب تو اس کو نعمتیں عطا کر چکے تو اس کو اپنی نعمت کا شکر گزار بنا، اور اس کو جزائے خیر عطا فرما، یا اللہ! میں نے ہرم بن حیان کو تیرے سپرد کیا، والسلام علیک و رحمۃ اللہ۔ پھر انہوں نے مجھے کہا: میں آج کے بعد تمہیں نہ دیکھوں۔ اللہ تعالیٰ تجھ پر رحم فرمائے۔ دراصل میں شہرت کو ناپسند کرتا ہوں اور خلوت و تنہائی کو پسند کرتا ہوں۔ کیونکہ جب تک میں لوگوں کے ساتھ دنیا میں زندہ ہوں، تب تک میں غمگین اور پریشان ہی رہوں گا۔ (آج کے بعد) تم میرے بارے میں کبھی کسی سے مت پوچھنا اور نہ ہی مجھے ڈھونڈنے کی کوشش کرنا۔ میری طرف سے تمہاری یہ ذمہ داری ہے۔ نہ تم مجھے دیکھنا اور نہ میں تمہیں دیکھوں۔ بس تم مجھے یاد کر کے میرے لئے دعا کیا کرنا اور ان شاء اللہ تعالیٰ میں تمہیں یاد کر کے تمہارے لئے دعا کیا کروں گا۔ تم یہاں سے چلے جاؤ، وہ فرماتے ہیں: میں نے خواہش کی کہ کچھ دور تک میں ان کے ہمراہ چلوں لیکن انہوں نے مجھے ساتھ چلنے سے منع کر دیا اور مجھے خود سے جدا کر دیا، جدا ہوتے ہوئے وہ بھی رو دیئے اور میری بھی آنکھیں چھلک پڑیں۔ (ہرم بن حیان) کہتے ہیں: میں ان کو جاتے ہوئے پیچھے سے دیکھتا رہا حتیٰ کہ وہ ایک گلی میں مڑ گئے، اس کے بعد میں نے ان کو بہت ڈھونڈا اور بہت لوگوں سے ان کے بارے میں پوچھا، لیکن مجھے کوئی شخص ایسا نہ ملا جو ان کے بارے میں کچھ بتاتا، اللہ تعالیٰ ان کی مغفرت فرمائے اور ان پر رحم فرمائے۔ اس کے بعد ہر جمعہ کو ایک یا دو مرتبہ خواب میں مجھے آپ کی زیارت ہوتی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5831]

شریک کہتے ہیں: ان کی مجلس میں سیدنا اویس قرنی رضی اللہ عنہ کا تذکرہ ہوا تو انہوں نے کہا: سیدنا اویس رضی اللہ عنہ سیدنا علی رضی اللہ عنہ کی ہمراہی میں لڑتے ہوئے شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5832]

ابومکین کہتے ہیں: میں نے ایک خاتون کو سیدنا اویس قرنی رضی اللہ عنہ کی مسجد میں دیکھا وہ کہہ رہی تھی: سیدنا اویس قرنی رضی اللہ عنہ اور ان کے ساتھی اس مسجد میں جمع ہو کر نماز ادا کرتے، قرآن کریم کی تلاوت کیا کرتے تھے اور میں ان کے لئے صبح اور شام کا کھانا لا کر یہاں رکھا کرتی تھی، وہ کہتی ہیں: یہ ان کا طریقہ تھا، یہ لوگ سیدنا اویس رضی اللہ عنہ کے ہمراہ سیدنا علی رضی اللہ عنہ کی حمایت میں لڑتے ہوئے شہید ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5833]