عاصم بن عمر کہتے ہیں: جب رسول اللہ صلی اللہ علیہ وسلم نے مہاجرین اور انصار کو ایک دوسرے کا بھائی بھائی بنایا تو بنی ہاشم میں سے سیدنا علی رضی اللہ عنہ اور سیدنا سہل بن حنیف رضی اللہ عنہ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5839]

سيدنا عبدالله بن عمر رضی اللہ عنہما کہتے ہیں: سیدنا سہل بن حنیف رضی اللہ عنہ نے جنگ بدر اور جنگ احد میں رسول اللہ صلی اللہ علیہ وسلم کے ہمراہ شرکت کی ہے، اور جنگ احد کے دن جب دوسرے لوگ بھاگ کھڑے ہوئے تھے اس وقت یہ حضور صلی اللہ علیہ وسلم کے ہمراہ ثابت قدم رہے تھے۔ انہوں نے موت پر رسول اللہ صلی اللہ علیہ وسلم کی بیعت کی تھی، اور جنگ احد کے دن تیروں کے ساتھ حضور صلی اللہ علیہ وسلم کا دفاع کیا تھا، رسول اللہ صلی اللہ علیہ وسلم نے فرمایا: سہل کو تیر دو کہ یہ احسن انداز میں تیر اندازی کرتا ہے، انہوں نے غزوہ خندق اور دیگر تمام غزوات میں رسول اللہ صلی اللہ علیہ وسلم کے ہمراہ شراکت کی۔ اور سیدنا علی رضی اللہ عنہ کے ہمراہ جنگ صفین میں بھی شرکت کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5839M]

سيدنا عبدالله بن عمر رضی اللہ عنہما اپنی سند کے ہمراہ بیان کرتے ہیں: سیدنا سہل بن حنیف رضی اللہ عنہ جنگ صفین سے واپس آنے کے بعد 38 ہجری کو کوفہ میں فوت ہوئے، اور امیرالمومنین سیدنا علی ابن ابی طالب رضی اللہ عنہ نے ان کی نماز جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5840]

عبداللہ بن معقل فرماتے ہیں: سیدنا علی رضی اللہ عنہ نے سیدنا سہل بن حنیف رضی اللہ عنہ کی نماز جنازہ پڑھائی اور اس میں 6 تکبیریں پڑھیں، پھر سیدنا علی رضی اللہ عنہ نے ہماری جانب متوجہ ہو کر فرمایا: یہ بدری صحابہ میں سے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5841]