سیدنا میمون ابوعبداللہ بن بریدہ اسلمی رضی اللہ عنہ فرماتے ہیں کہ رسول اللہ صلی اللہ علیہ وسلم نے خیبر میں اپنے پڑاؤ کے دوران فرمایا تھا کہ میں کل ایسے شخص کو جھنڈا دوں گا جو اللہ اور اس کے رسول سے محبت کرتا ہے اور اللہ اور اس کا رسول اس سے محبت کرتے ہیں، اگلے دن بہت سارے صحابہ کرام اس امتیاز کو حاصل کرنے کے طلبگار تھے، لیکن رسول اللہ صلی اللہ علیہ وسلم نے سیدنا علی رضی اللہ عنہ کو طلب فرمایا، اس وقت سیدنا علی رضی اللہ عنہ کی آنکھیں آئی ہوئی تھیں، رسول اللہ صلی اللہ علیہ وسلم نے ان کی آنکھوں میں اپنا لعاب دہن مبارک لگایا، ان کو جھنڈا عطا فرمایا، اور لوگوں کو ان کے ہمراہ روانہ فرمایا۔ ان لوگوں نے سیدنا علی رضی اللہ عنہ کی ہمراہی میں خیبر پر حملہ کیا، ان کی مڈبھیڑ مرحب سے ہو گئی، وہ یہ رجزیہ اشعار پڑھتا ہوا آگے بڑھ رہا تھا۔ * خیبر جانتا ہے کہ میں مرحب ہوں، میں جنگی ہتھیاروں سے لیس، جنگ کے داؤ پیچ کو جاننے والا سپہ سالار ہوں۔ * جب تلواروں سے تلواریں ٹکرانا شروع ہو جاتی ہیں تو میں کبھی نیزے سے حملہ کرتا ہوں اور کبھی تلوار کا وار کرتا ہوں۔ اس کے بعد سیدنا علی رضی اللہ عنہ اور مرحب کے درمیان گھمسان کا رن پڑا، سیدنا علی رضی اللہ عنہ نے اس کے سر پر ایک کاری ضرب لگائی، جو اس کی زرہ، خود اور سر کو چیرتی ہوئی اس کی داڑھوں کو کاٹ کر اس کے جبڑے تک پہنچ گئی، پورے لشکر نے اس حملے کی آواز سنی، سیدنا علی رضی اللہ عنہ نے اس کو واصل جہنم کر دیا۔ ابھی پورا لشکر خیبر میں نہیں پہنچا تھا کہ خیبر فتح ہو گیا۔ اس موضوع پر بہت ساری احادیث ہیں، ان کو میں نے ان کے متعلقہ ابواب میں درج کر دیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5956]

محمد بن عمر واقدی نے (ان کے صاحبزادے سیدنا عبدالملک کے واسطے سے ایک) روایت بیان کی ہے (اس روایت سے سیدنا سعید کا نسب یوں سامنے آتا ہے) ” سعید بن زید بن عمرو بن نفیل بن عبدالعزیٰ بن رباح بن رزاخ بن عدی بن کعب بن لؤی بیان کرتے ہیں کہ سیدنا عمرو بن نفیل اور عمر کے والد سیدنا خطاب بن نفیل دونوں باپ کی طرف سے بھائی ہیں۔ (یعنی ان دونوں کے والد ایک ہیں اور مائیں الگ الگ ہیں) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5957]

سیدنا عروہ کہتے ہیں: رسول اللہ صلی اللہ علیہ وسلم کے غزوہ بدر سے واپس آنے کے بعد سیدنا سعید بن زید بن عمرو بن نفیل شام سے آئے، اور رسول اللہ صلی اللہ علیہ وسلم سے عرض کی، تو آپ صلی اللہ علیہ وسلم نے ان کے لئے بدر کے مال غنیمت سے حصہ عطا فرمایا۔ انہوں نے عرض کی: یا رسول اللہ صلی اللہ علیہ وسلم اور میرا ” ثواب “؟ تو رسول اللہ صلی اللہ علیہ وسلم نے ان کو ثواب بھی عطا فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5958]

ابن اسحاق فرماتے ہیں کہ بنی عدی بن کعب بن فہر بن مالک کی جانب سے رسول اللہ صلی اللہ علیہ وسلم کے ہمراہ جنگ بدر میں شریک ہونے والوں میں ” سیدنا سعید بن زید بن عمرو بن نفیل بن عبدالعزیٰ بن رباح برقرط بن رزاح بن عدی بن کعب بن لؤی بن غالب بن فہر بن مالک “ بھی تھے۔ ان کی والدہ کا نام ” فاطمہ بنت بعجہ “ ہیں ان کا تعلق قبیلہ خزاعہ کے ساتھ ہے؟ رسول اللہ صلی اللہ علیہ وسلم جنگ بدر سے واپس آئے تو یہ ملک شام سے آئے تھے، رسول اللہ صلی اللہ علیہ وسلم نے ان کے لئے غزوہ بدر کے مال غنیمت سے حصہ عطا کیا تھا، انہوں نے عرض کی: یا رسول اللہ صلی اللہ علیہ وسلم میرے حصہ کا ثواب؟ آپ صلی اللہ علیہ وسلم نے ان کو ثواب بھی عطا فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5959]