سیدنا عبادہ بن نسی عبدالملک بن مروان کی جانب سے اردن کے گورنر تھے، آپ فرماتے ہیں کہ میں کچھ لوگوں کے پاس سے گزرا، وہ لوگ ایک بزرگ کے قریب جمع تھے اور وہ بزرگ ان کو احادیث سنا رہے تھے۔ جب میں ان کے قریب پہنچا تو لوگوں نے میرے لئے جگہ بنا دی، میں نے سنا وہ شیخ کہہ رہے تھے: تین چیزیں تمہارے پاس امانت ہیں، جو ان کی حفاظت کرے گا، وہ مومن ہے اور جو ان کی حفاظت نہیں کرے گا، وہ مومن نہیں ہے۔ * وہ شخص جس نے نماز نہ پڑھی ہو اور وہ کہے کہ میں نے نماز پڑھ لی۔ * وہ شخص جس نے روزہ نہ رکھا ہو اور کہے کہ میں نے روزہ رکھا ہے۔ * وہ شخص جس نے جنابت کا غسل نہ کیا ہو اور کہے کہ میں نے غسل کر لیا ہے۔ عبادہ کہتے ہیں: میرے دائیں جانب سے کسی نے پوچھا: یہ کون بزرگ ہیں؟ تو دوسرے شخص نے جواب دیا کہ یہ رسول اللہ صلی اللہ علیہ وسلم کے صحابی سیدنا عقبہ بن عامر جہنی رضی اللہ عنہ ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6084]

زیاد کے آزاد کردہ غلام بیان کرتے ہیں کہ مجھے زیاد نے سیدنا حجر بن عدی کی جانب ان کو بلانے کے لئے بھیجا، ان کو ” ابن اوبر “ کہا جاتا تھا۔ سیدنا حجر نے آنے سے انکار کر دیا۔ زیاد نے دوسری مرتبہ بھیجا لیکن انہوں نے اس بار بھی آنے سے منع کر دیا۔ اس نے تیسری مرتبہ یہ کہہ کر بھیجا کہ تم ایسے امور کی دم کے پیچھے پڑنے سے باز آ جاؤ جن امور کے سینوں پر سوار ہونے والے بھی ہلاک ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6085]

زیاد بن علاثہ فرماتے ہیں: میں نے سیدنا حجر بن ادبر کو دیکھا، جب زیاد نے ان کو سیدنا معاویہ کی جانب بھیجا۔ (ان کی کیفیت یہ تھی کہ) ان کو اونٹ کے ساتھ ایک جانب باندھا گیا تھا اور ان کے پاؤں ایک جانب لٹک رہے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6086]

مصعب بن عبداللہ زبیری فرماتے ہیں حجر بن عدی کندی رضی اللہ عنہ کی کنیت ” ابوعبدالرحمن “ تھی۔ آپ رسول اللہ صلی اللہ علیہ وسلم کی بارگاہ میں آئے تھے، جنگ قادسیہ، جنگ جمل اور صفین میں سیدنا علی رضی اللہ عنہ کے ہمراہ شریک ہوئے تھے۔ معاویہ بن ابوسفیان نے ان کو مقام ” مرج عذراء “ پر شہید کیا، ان کے دو بیٹے تھے، عبداللہ اور عبدالرحمن۔ ان دونوں کو مصعب بن عمیر نے باندھ کر شہید کیا تھا۔ سیدنا حجر بن عدی رضی اللہ عنہ 53 ہجری میں شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6087]

سیدنا نافع فرماتے ہیں: جب سیدنا حجر بن عدی رضی اللہ عنہ کو سیدنا معاویہ رضی اللہ عنہ کی جانب بھیجا جا رہا تھا، لوگ بہت حیران تھے اور پوچھتے تھے کہ حجر کا قصور کیا ہے؟ یہ خبر سیدنا عبداللہ بن عمر رضی اللہ عنہما تک پہنچی، وہ اس وقت بازار میں کسی جگہ روپوش تھے، آپ نے روپوشی ختم کی اور لوگوں کے درمیان آ گئے۔ جب وہ واپس جا رہے تھے تو میں ان کی پھوٹ پھوٹ کر رونے کی آوازیں سن رہا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6088]