ابراہیم بن منذر حزامی فرماتے ہیں: ابوخالد حکیم بن حزام کا انتقال 60 ہجری کو ہوا، ان کی عمر 120 سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6156]

سیدنا حکیم بن حزام رضی اللہ عنہ فرماتے ہیں: اصحاب الفیل کے آنے سے 13 برس پہلے میری پیدائش ہوئی۔ میں ان دنوں سمجھدار تھا جب سیدنا عبدالمطلب نے اپنے بیٹے سیدنا عبداللہ کو ذبح کرنے کا ارادہ کیا تھا۔ یہ رسول اللہ صلی اللہ علیہ وسلم کی ولادت سے پانچ سال پہلے کا واقعہ ہے۔ محمد بن عمر فرماتے ہیں: حکیم بن حزام اپنے والد کے ہمراہ ” فجار “ میں شریک ہوئے تھے، ان کے والد حزام بن خویلد دوسری جنگ فجار میں مارے گئے تھے۔ حکیم بن حزام رضی اللہ عنہ کی کنیت ” ابوخالد “ تھی۔ ان کی اولاد امجاد یہ ہیں ” عبداللہ، خالد، یحیی، ہشام۔ ان کی والدہ زینب بنت عوام بن خویلد بن عبدالعزیٰ بن قصی “ ہیں۔ بعض مؤرخین کا کہنا ہے کہ ” ہشام بن حکیم کی والدہ ” ملیکہ بنت مالک بن سعد ہیں، ان کا تعلق بنی حارث بن فہر کے ساتھ تھا، حکیم بن حزام کے تمام بیٹوں نے رسول اللہ صلی اللہ علیہ وسلم کی صحبت پائی ہے، فتح مکہ کے موقع پر مسلمان ہوئے اور آپ صلی اللہ علیہ وسلم کے صحابہ میں نام پایا۔ کہا جاتا ہے کہ حکیم بن حزام رضی اللہ عنہ کی عمر 120 برس ہوئی تھی۔ ایک مرتبہ حج کے موقع پر سیدنا امیر معاویہ رضی اللہ عنہ ان کے پاس سے گزرے تو ان سے پوچھا کہ آپ کھاتے کیا ہیں؟ سیدنا حکیم نے فرمایا: مجھ سے کوئی چیز چبائی نہیں جاتی، تو سیدنا معاویہ رضی اللہ عنہ نے ایک دودھ والی اونٹنی ان کو تحفہ بھیجی تاکہ وہ اس کا دودھ پیئں۔ اور (مال کی بھری ہوئی) ایک ٹوکری بھی بھیجی، لیکن سیدنا حکیم بن حزام رضی اللہ عنہ نے ان کا یہ تحفہ قبول کرنے سے انکار کر دیا۔ اور فرمایا: میں نبی اکرم صلی اللہ علیہ وسلم کے بعد کسی سے کوئی چیز بھی قبول نہیں کروں گا۔ مجھے تو ابوبکر رضی اللہ عنہ اور عمر رضی اللہ عنہ نے میرا حق دینے کے لئے بلوایا تھا، میں نے ان سے اپنا حق لینے سے انکار کر دیا تھا۔ ابن عمر کہتے ہیں: سیدنا حکیم بن حزام سے پوچھا گیا: اے ابوخالد مال کیا ہے؟ آپ نے فرمایا: کم بچے ہونا۔ اور محمد بن عمر فرماتے ہیں: حکیم بن حزام رضی اللہ عنہ مدینہ منورہ آئے، وہاں قیام کیا۔ ایک مکان بھی بنایا۔ اور 120 سال کی عمر میں مدینہ منورہ میں 54 ہجری کو انتقال ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6157]

ابو الزناد بیان کرتے ہیں کہ: حکیم بن حزام (رضی اللہ عنہ) سے پوچھا گیا کہ "اے ابو خالد! مال (دولت) کیا ہے؟" تو انہوں نے جواب دیا: "عیال (اہل و عیال) کی قلت"۔ (راوی کہتے ہیں کہ:) حکیم بن حزام مدینہ منورہ تشریف لائے، وہیں سکونت اختیار کی اور ایک گھر تعمیر کیا۔ ان کی وفات سن 54 ہجری میں مدینہ میں ہوئی جبکہ ان کی عمر ایک سو بیس (120) برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6158]

مصعب بن عبداللہ نے حکیم بن حزام رضی اللہ عنہ کا نسب بیان کرنے کے بعد فرمایا ” ان کی والدہ فاختہ بنت زہیر بن اسد بن عبدالعزیٰ “ ہیں۔ انہوں نے حکیم کو کعبہ میں جنم دیا۔ یہ حاملہ تھیں، کعبہ میں گئیں اور وہیں ان کو درد زہ شروع ہو گئی، اور حکیم کی پیدائش ہو گئی، چمڑے کے ایک قالین پر پیدائش کا عمل ہوا، اور ان کے نیچے جو کپڑے تھے وہ زمزم کے کنویں پر لا کر دھوئے گئے، نہ ان سے پہلے کوئی کعبہ میں پیدا ہوا نہ ان کے بعد۔ ٭٭ امام حاکم کہتے ہیں: مصعب کو اس حدیث کے آخر میں وہم ہوا ہے۔ کیونکہ اس بارے میں روایات حد تواتر تک پہنچی ہوئی ہیں کہ سیدہ فاطمہ بنت اسد نے امیرالمومنین سیدنا علی رضی اللہ عنہ کو کعبہ کے اندر جنم دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6159]

ہشام بن عروہ اپنے والد کا یہ بیان نقل کرتے ہیں کہ سیدنا حکیم بن حزام رضی اللہ عنہ نے سیدنا ابوبکر صدیق رضی اللہ عنہ سے، سیدنا عمر رضی اللہ عنہ سے، سیدنا عثمان رضی اللہ عنہ سے اور نہ سیدنا معاویہ رضی اللہ عنہ سے کسی سے کبھی کچھ قبول نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6160]

سیدنا حکیم بن حزام فرماتے ہیں: میں نے زمانہ جاہلیت میں 40 غلام آزاد کئے، میں نے رسول اللہ صلی اللہ علیہ وسلم سے پوچھا: یا رسول اللہ صلی اللہ علیہ وسلم کیا مجھے ان کا ثواب ملے گا؟ رسول اللہ صلی اللہ علیہ وسلم نے فرمایا: تو ان اعمال پر ایمان لایا ہے جو گزر چکے ہیں۔ (یعنی تجھے ان کا بھی ثواب ملے گا) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6161]