سیدنا ابوہریرہ رضی اللہ عنہ فرماتے ہیں: میں حارثہ کے دو صاحبزادوں یعنی اسماء اور ہند کو نبی اکرم صلی اللہ علیہ وسلم کا خدمت گزار ہی سمجھتا رہا، کیونکہ وہ دونوں اکثر اوقات نبی اکرم صلی اللہ علیہ وسلم کے دروازے پر موجود ہوتے تھے۔ اور نبی اکرم صلی اللہ علیہ وسلم کی خدمت کرتے تھے۔ یہ دونوں غریب لوگ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6381]

محمد بن عمر فرماتے ہیں: سیدنا ہند بن حارثہ اسلمی رضی اللہ عنہ حدیبیہ میں رسول اللہ صلی اللہ علیہ وسلم کے ہمراہ شریک تھے۔ سیدنا ہند بن حارثہ رضی اللہ عنہ سیدنا علی رضی اللہ عنہ کے دور خلافت میں مدینہ منورہ میں فوت ہوئے۔ مؤرخین کا کہنا ہے کہ یہ آٹھ بھائی تھے، سب کے سب نبی اکرم صلی اللہ علیہ وسلم کے صحابی تھے۔ سب لوگ بیعت رضوان میں شریک ہوئے تھے۔ ان کے اسمائے گرامی یہ ہیں: (1) سیدہ اسماء رضی اللہ عنہ (2) سیدنا ہند رضی اللہ عنہ (3) سیدنا خراش رضی اللہ عنہ (4) سیدنا ذویب رضی اللہ عنہ (5) سیدنا حمران رضی اللہ عنہ (6) سیدنا فضالہ رضی اللہ عنہ (7) سیدنا سلمہ رضی اللہ عنہ (8) سیدنا مالک۔ یہ تمام سیدنا حارثہ بن سعید کے بیٹے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6382]

سیدنا سلمہ بن اکوع رضی اللہ عنہ فرماتے ہیں: نبی اکرم صلی اللہ علیہ وسلم نے عاشوراء کے دن اسلم قبیلے کے ایک آدمی کے ہاتھ پیغام بھیجا کہ جس نے بھی کچھ کھا، پی لیا ہے وہ اپنا روزہ پورا کرے۔ اور جس نے کچھ نہیں کھایا، پیا وہ دن کا باقی حصہ بھی روزے سے گزارے۔ پیچھے یہ روایت گزر چکی ہے جس میں یہ ثابت ہوا ہے کہ رسول اللہ صلی اللہ علیہ وسلم کا یہ پیغام لے جانے والے ” سیدہ اسماء بن حارثہ “ تھے۔ ایک روایت یہ بھی ہے کہ وہ ” سیدنا ہند بن حارثہ رضی اللہ عنہ “ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6383]