ابوکریب روایت کرتے ہیں کہ سیدنا عبداللہ بن عباس رضی اللہ عنہما نے ارشاد فرمایا: میں رات کے آخری حصے میں نبی اکرم صلی اللہ علیہ وسلم کی خدمت میں حاضر ہوا، آپ اس وقت نماز پڑھ رہے تھے، میں بھی آپ صلی اللہ علیہ وسلم کے پیچھے کھڑا ہو گیا۔ آپ صلی اللہ علیہ وسلم نے پکڑ کر مجھے اپنے برابر کھڑا کر لیا، آپ صلی اللہ علیہ وسلم نماز میں مشغول ہو گئے تو میں پیچھے کی طرف کھسک گیا، جب نبی اکرم صلی اللہ علیہ وسلم نماز سے فارغ ہوئے تو پیچھے کھسکنے کی وجہ پوچھی، تو میں نے کہا: آپ اللہ تعالیٰ کے رسول ہیں، کسی امتی کو یہ حق نہیں پہنچتا کہ وہ آپ کے برابر کھڑا ہو کر نماز پڑھے۔ نبی اکرم صلی اللہ علیہ وسلم کو ان کی یہ بات بہت اچھی لگی، آپ صلی اللہ علیہ وسلم نے خوش ہو کر ان کے لئے دعا فرمائی کہ اللہ تبارک و تعالیٰ میری فہم و فراست میں برکت عطا فرمائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6412]