ہلال بن یساف فرماتے ہیں: جو قاصد مختار کا سر لے کر سیدنا عبداللہ بن زبیر رضی اللہ عنہ کی خدمت میں حاضر ہوا تھا، اس کا بیان ہے کہ انہوں نے جب سیدنا عبداللہ بن زبیر کو دیکھا تو سیدنا عبداللہ بن زبیر نے اس سے کہا: سیدنا کعب نے جو حدیث بھی مجھے سنائی، میں نے اس کا مصداق پا لیا۔ صرف ایک بات ابھی تک پوری نہیں ہوئی، وہ یہ کہ قبیلہ ثقیف کا ایک شخص مجھے قتل کرے گا۔ سیدنا اعمش فرماتے ہیں: ان کو کیا معلوم تھا کہ ” ابومحمد “ (اللہ تعالیٰ اس کو رسوا کرے) کو اللہ تعالیٰ نے اسی کام کے لئے رکھا ہوا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6469]

ابن ابی ملیکہ فرماتے ہیں: سیدنا عبداللہ بن زبیر سات سات دن مسلسل جنگ میں لڑتے رہے، پورے ہفتے کے بعد بھی وہ ہم سے زیادہ بہادر تھے، یوںلگتا تھا گویا کہ کوئی شیر ہو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6470]

عمر بن قیس فرماتے ہیں: سیدنا عبداللہ بن زبیر رضی اللہ عنہ کے ایک سو غلام تھے، ہر غلام الگ زبان میں بات کرتا تھا اور سیدنا عبداللہ بن زبیر رضی اللہ عنہ ہر غلام کے ساتھ اسی کی زبان میں بات کیا کرتے تھے۔ اور اگر تم دنیاوی امور میں ان کی مشغولیت دیکھو تو کہو گے کہ یہ شخص ایک لمحے کے لئے دینی کاموں میں مشغول نہیں ہوتا، اور اگر تم ان کو دینی امور میں مشغول دیکھو تو کہو گے کہ یہ شخص کبھی دنیاوی امور میں مشغول ہوا ہی نہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6471]