سیدنا ابوسعید خدری رضی اللہ عنہ کے بارے میں مروی ہے کہ وہ فرمایا کرتے تھے کہ تم حدیث بیان کیا کرو، کیونکہ ایک حدیث سے دوسری یاد آ جاتی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6532]

سیدنا عبدالرحمن بن ابی سعید خدری رضی اللہ عنہ اپنے والد کا یہ بیان نقل کرتے ہیں کہ میرے والد نے مجھے کہا: میں بوڑھا ہو چکا ہوں، میری جماعت اور میرے ساتھی تقریباً وفات پا چکے ہیں، تم میرا ہاتھ تھامو، راوی کہتے ہیں: پھر وہ میرے سہارے پر چلتے چلتے بقیع مبارک کے آخری حصے میں ایک مقام جہاں پر لوگ تدفین نہیں کرتے تھے، وہاں آئے اور فرمایا: اے بیٹے! جب میں فوت ہو جاؤں تو مجھے یہاں پر دفن کرنا، میرے مزار پر خیمہ نصب نہ کرنا، میرے جنازے کے ہمراہ آگ لے کر نہ چلنا، اور یرے جنازے پر کسی رونے والی کو رونے کی اجازت نہ دینا، میرے جنازے کی کسی کو اطلاع بھی نہ دینا، اور چھوٹی تنگ گلیوں میں سے گزرنا اور تم تیز تیز چلتے ہوئے جنازہ لے جانا۔ سیدنا ابوسعید خدری رضی اللہ عنہ کا انتقال جمعہ کے دن ہوا۔ کیونکہ والد محترم نے اعلان نہ کرنے کی وصیت فرمائی تھی، اس لئے میں نے آپ کی وفات کا اعلان نہ کیا، لوگوں کو خود ہی پتا چل گیا اور لوگ آ آ کر پوچھتے تھے کہ جنازہ کب نکلے گا؟ میں کہہ دیتا: جب جنازہ تیار ہو گا تب نکلے گا۔ آپ فرماتے ہیں: اس کے باوجود پورا بقیع مبارک آپ کے جنازے میں شرکت کے لئے انسانوں سے بھر گیا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6533]

سیدنا ابونضرہ فرماتے ہیں: میں نے سیدنا ابوسعید خدری رضی اللہ عنہ سے کہا: آپ ہمیں بہت دلچسپ اور عجیب احادیث سناتے ہیں، ہمیں یہ ڈر ہے کہ ان میں کہیں کمی زیادتی نہ ہو جائے، اگر ہم ان کو لکھ لیں تو کیسا ہے؟ انہوں نے لکھنے سے منع فرماتے ہوئے کہا: تم احادیث کو قرآن بنانے کی کوشش مت کرو (یعنی جیسے وہ لکھا ہوا ہے، احادیث کو بھی اسی انداز میں لکھو گے تو قرآن کریم کی برابری ہو جائے گی، اس لئے تم احادیث کو لکھو مت بلکہ) جیسے ہم نے احادیث یاد کی ہیں، تم بھی ہم سے پڑھ کر اسی طرح یاد کر لو، پھر فرمایا: جیسے ہم نے رسول اللہ صلی اللہ علیہ وسلم سے احادیث یاد کی ہیں، اسی طرح تم ہم سے یاد کر لو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6534]