مصعب بن عبداللہ فرماتے ہیں: سیدنا عبداللہ بن ابی حدرد اسلمی رضی اللہ عنہ کی کنیت ” ابومحمد “ ہے، 81 برس کی عمر سن 71 ہجری میں ان کا انتقال ہوا۔ ابوحدرد کا نام ” سلامہ “ ہے۔ یہ قبیلہ اسلم کی ایک شاخ رفاعہ سے تعلق رکھتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6588]

سیدنا انس بن مالک رضی اللہ عنہ کے آزاد کردہ غلام بیان کرتے ہیں کہ میں نے سیدنا انس رضی اللہ عنہ سے پوچھا کہ آپ نے جنگ بدر میں شرکت کی ہے؟ تو انہوں نے جواباً فرمایا: تیری ماں نہ رہے، میں جنگ بدر سے کہاں غائب رہوں گا۔ انصاری کہتے ہیں: جب رسول اللہ صلی اللہ علیہ وسلم جنگ بدر کے لئے روانہ ہوئے تو سیدنا انس بن مالک رضی اللہ عنہ بھی رسول اللہ صلی اللہ علیہ وسلم کے ہمراہ نکلے، آپ اس وقت بچے تھے اور رسول اللہ صلی اللہ علیہ وسلم کی خدمت کیا کرتے تھے۔ ابوحاتم کہتے ہیں: ہم نے انصاری سے پوچھا: وفات کے وقت سیدنا انس بن مالک رضی اللہ عنہ کی عمر کتنی تھی؟ انہوں نے کہا 107 سال۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6589]