سیدنا عمیر بن قتادہ لیثی رضی اللہ عنہ فرماتے ہیں: میرے دل میں کچھ سوالات تھے اور میں ہر وقت اس پریشانی میں رہتا تھا کہ میں ان کے بارے میں رسول اللہ صلی اللہ علیہ وسلم سے پوچھ نہیں سکا، اور نہ ہی کسی اور نے وہ باتیں رسول اللہ صلی اللہ علیہ وسلم سے پوچھیں کہ میں سن لیتا، میں کسی مناسب وقت کی تاک میں تھا۔ ایک دن میں رسول اللہ صلی اللہ علیہ وسلم کی بارگاہ میں حاضر ہوا، اس وقت آپ صلی اللہ علیہ وسلم وضو کر رہے تھے، مجھے حضور صلی اللہ علیہ وسلم میں وہ دو کیفیتیں مل گئیں جن کے بارے میں میری خواہش تھی کہ آپ صلی اللہ علیہ وسلم ان دو کیفیتوں میں ہوں اور میری ملاقات ہو جائے، ان میں سے ایک بات تو یہ تھی کہ حضور صلی اللہ علیہ وسلم فارغ تھے اور دوسری بات یہ تھی کہ آپ صلی اللہ علیہ وسلم کا مزاج شریف بہت خوشگوار تھا، میں نے عرض کی: یا رسول اللہ صلی اللہ علیہ وسلم کیا مجھے کچھ سوالات پوچھنے کی اجازت ہے؟ آپ صلی اللہ علیہ وسلم نے فرمایا: ہاں تم جو پوچھنا چاہتے ہو، پوچھو۔ میں نے کہا: یا رسول اللہ صلی اللہ علیہ وسلم ! ایمان کیا ہے؟ آپ صلی اللہ علیہ وسلم نے فرمایا: سخاوت اور صبر۔ میں نے پوچھا: یا رسول اللہ صلی اللہ علیہ وسلم کس مومن کا ایمان سب سے افضل ہے؟ آپ صلی اللہ علیہ وسلم نے فرمایا: جس کا اخلاق سب سے افضل ہے۔ میں نے پوچھا: یا رسول اللہ صلی اللہ علیہ وسلم کس مسلمان کا اسلام سب سے افضل ہے؟ آپ صلی اللہ علیہ وسلم نے فرمایا: جس کے ہاتھ اور زبان سے دوسرے مسلمان محفوظ ہوں۔ میں نے پوچھا: کون سا جہاد سب سے افضل ہے؟ آپ صلی اللہ علیہ وسلم نے اپنا سر جھکا لیا اور بہت دیر تک خاموش رہے، اتنی دیر خاموشی سے مجھے یہ خوف ہونے لگا کہ شاید میں نے رسول اللہ صلی اللہ علیہ وسلم کو مشقت میں مبتلا کر دیا ہے، اور میری یہ خواہش ہونے لگی کہ کاش میں نے یہ سوال ہی نہ کیا ہوتا، جبکہ گزشتہ دن میں نے حضور صلی اللہ علیہ وسلم کو یہ فرماتے ہوئے بھی سنا تھا کہ مسلمانوں میں سب سے بڑا مجرم وہ شخص ہے جس کے سوال کی وجہ سے ایسی چیز حرام ہو جائے جو اس کے سوال سے پہلے حلال تھی۔ میں نے کہا: میں اللہ کے غضب سے اور اللہ کے رسول کے غضب سے اللہ کی پناہ مانگتا ہوں۔ پھر حضور صلی اللہ علیہ وسلم نے اپنا سر اٹھایا اور فرمایا: تم نے کیا پوچھا تھا؟ میں نے کہا: کون سا جہاد سب سے افضل ہے؟ رسول اللہ صلی اللہ علیہ وسلم نے فرمایا: ظالم حکمران کے سامنے کلمہ حق بولنا۔ ٭٭ اس حدیث کے راوی جو ابوبدر ہیں اور عبداللہ بن عبید بن عمیر سے روایت کر رہے ہیں، ان کا نام بشار بن حکم ہے۔ یہ بصرہ میں شیخ الحدیث ہیں۔ انہوں نے ثابت البنانی سے اس حدیث کے علاوہ بھی کئی احادیث روایت کی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6773]

خلیفہ بن خیاط نے ان کا نسب یوں بیان کیا ہے ” شداد بن الہاد بن عمرو بن عبداللہ بن جابر بن نمیر بن عتوارہ بن عامر بن لیث بن بکرہ “۔ ہاد کا اصل نام ” اسامہ “ ہے۔ یہی عبداللہ بن شداد بن الہاد ہیں۔ آپ کوفہ میں منتقل ہو گئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6774]

ابوعبیدہ نے بھی مذکورہ بالا نسب بیان کیا ہے اور اس کے بعد فرمایا: ان کا نام ” ہاد “ اس لئے رکھا گیا کہ وہ لوگوں کو راستہ بتایا کرتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6775]