سیدنا سائب بن ابولبابہ بیان کرتے ہیں کہ سیدنا ابولبابہ کے تائب ہونے کا واقعہ کچھ یوں ہے، جب اللہ تعالیٰ نے ان کو توبہ کی توفیق دی، سیدنا ابولبابہ رضی اللہ عنہ خود اپنی زبانی بیان کرتے ہیں کہ میں رسول اللہ صلی اللہ علیہ وسلم کی بارگاہ میں حاضر ہوا، اور عرض کی: یا رسول اللہ صلی اللہ علیہ وسلم ! میں نے اپنی قوم کا وہ گھر چھوڑ دیا ہے جس میں رہ کر میں گناہوں میں مبتلا ہوا، اور میں اپنا سارا مال اللہ اور اس کے رسول کی رضا کے لئے صدقہ کرنا چاہتا ہوں، رسول اللہ صلی اللہ علیہ وسلم نے فرمایا: اے ابولبابہ! تیسرا حصہ کافی ہے۔ آپ فرماتے ہیں: میں نے اپنے مال کا تیسرا حصہ اللہ اور اس کے رسول کی رضا کے لئے صدقہ کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6803]

ابن اسحاق نے ان کا نسب یوں بیان کیا ہے ” ابوحبہ ثابت بن نعمان بن امیہ بن ثعلبہ بن عمرو بن عوف بن مالک بن اوس “۔ آپ جنگ احد کے موقع پر شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6804]

سیدنا عبداللہ بن عمرو بن عثمان نے سنا کہ سیدنا ابوحبہ رضی اللہ عنہ لوگوں کو فتویٰ دے رہے تھے کہ کسی بھی قسم کے کنکر کے ذریعے جمرات کی رمی کرنے میں کوئی حرج نہیں ہے۔ سیدنا عبداللہ بن عمرو بن عثمان فرماتے ہیں: میں نے بعد میں اس بات کا ذکر سیدنا عبداللہ بن عمر رضی اللہ عنہما کے سامنے کیا، انہوں نے فرمایا: ابوحبہ نے سچ کہا ہے، سیدنا ابوحبہ رضی اللہ عنہ بدری صحابی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6805]