ابن شہاب کہتے ہیں: وہ لوگ جو حبشہ کی جانب پہلی ہجرت کے بعد رسول اللہ صلی اللہ علیہ وسلم کے پاس مکہ میں آئے تھے اور پھر مدینہ منورہ کی جانب بھی ہجرت کی تھی، ان میں ” ابوسلمہ عبداللہ بن عبدالاسد “ اور ان کی زوجہ ” ام سلمہ بنت ابی امیہ “ ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6909]

مصعب بن عبداللہ زبیری فرماتے ہیں: سیدہ ام سلمہ رضی اللہ عنہا کا اصل نام ” رملہ “ ہے، آپ پہلی مہاجرہ ہیں جو ہجرت کر کے مدینہ منورہ آئیں۔ آپ رسول اللہ صلی اللہ علیہ وسلم سے پہلے ” ابوسلمہ عبداللہ بن عبدالاسد بن ہلال بن عبداللہ بن عمر بن مخزوم “ کے نکاح میں تھیں۔ ابوسلمہ حبشہ کی جانب سب سے پہلے ہجرت کرنے والی شخصیت ہیں اور آپ نے غزوہ بدر میں بھی شرکت کی۔ رسول اللہ صلی اللہ علیہ وسلم کے دور میں ہی ان کا انتقال ہو گیا تھا۔ ام سلمہ کے بطن سے ابوسلمہ کے چار بچے سلمہ، عمر، درہ اور زینب پیدا ہوئے۔ ان کی والدہ ام سلمہ ہیں جنہوں نے بعد میں رسول اللہ صلی اللہ علیہ وسلم سے نکاح کیا۔ ام سلمہ کے بیٹے عمر بن ابی سلمہ نے رسول اللہ صلی اللہ علیہ وسلم کی متعدد احادیث روایت کی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6910]