سیدنا عامر فرماتے ہیں: سیدنا بنت جحش رضی اللہ عنہا رسول اللہ صلی اللہ علیہ وسلم سے کہا کرتی تھی: آپ کی تمام بیویوں سے میرا حق سب سے زیادہ ہے، کیونکہ مقام نکاح کے لحاظ سے میں سب سے بہتر ہوں، میں سب سے زیادہ پردے کا اہتمام کرتی ہوں، اور آپ کی سب سے زیادہ قریبی رشتہ دار ہوں۔ پھر آپ فرماتی: اللہ تعالیٰ نے عرش کے اوپر میرا نکاح پڑھایا، اس چیز کا سفیر سیدنا جبریل امین علیہ السلام ہیں۔ میں آپ کی پھوپھی کی بیٹی ہوں۔ اور آپ کی بیویوں میں سے میرے علاوہ اور کوئی بھی آپ کا اتنا قریبی رشتہ دار کوئی نہیں ہے۔ (امام حاکم کہتے ہیں) ہم نے ان کے ترجمۃ الباب کے آغاز ہی میں ذکر کر دیا تھا کہ سیدہ زینب بنت جحش رضی اللہ عنہا کی والدہ ” امیمہ بنت عبدالمطلب بن ہاشم “ ہیں، اور وہ نبی اکرم صلی اللہ علیہ وسلم کی پھوپھی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6940]

مجاہد کہتے ہیں: سیدہ جویریہ بنت الحارث نے رسول اللہ صلی اللہ علیہ وسلم سے عرض کی: آپ کی ازواج مجھے یہ بات بہت فخریہ بیان کرتی ہیں اور کہتی ہیں: رسول اللہ صلی اللہ علیہ وسلم نے تم سے نکاح نہیں کیا، تم تو ان کی ” کنیز “ ہو، رسول اللہ صلی اللہ علیہ وسلم نے فرمایا: کیا میں نے تمہارا حق مہر سب سے عظیم نہیں کر دیا تھا؟ کیا میں نے تمہاری قوم کے چالیس افراد کو آزاد نہیں کیا؟ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6941]

ام المومنین سیدہ عائشہ رضی اللہ عنہا فرماتی ہیں: جب رسول اللہ صلی اللہ علیہ وسلم کے پاس بنی مصطلق کی لونڈیاں مال غیمت کے طور پر آئیں، تو جویریہ بنت حارث بن ابی ضرار رضی اللہ عنہا سیدنا ثابت بن قیس بن شماس رضی اللہ عنہ کے حصہ میں آئیں، انہوں نے اپنے آپ کو ان سے مکاتب بنوا لیا، آپ بہت حسین و جمیل تھیں، جو بھی ان کو ایک نظر دیکھ لیتا وہ دل تھام کر بیٹھ جاتا تھا، آپ اپنی کتابت کے سلسلے میں مدد لینے کے لئے رسول اللہ صلی اللہ علیہ وسلم کی خدمت میں آئیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6942]