سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم کے بچوں میں سب سے بڑے ” سیدنا قاسم “ تھے، پھر زینب رضی اللہ عنہا تھیں، سیدہ زینب کا نکاح ” ابوالعاص بن ربیع “ کے ساتھ ہوا، ان کے ہاں ” علی اور امامہ “ پیدا ہوئے۔ ابوالعاص نے ان کے بارے میں درج ذیل اشعار کہے۔ ” میں نے زینب کو یاد کیا جب اس کا انتقال ہو گیا، میں نے کہا ایسے شخص کے لئے سیرابی ہے جو حرم میں رہتا ہو، زینب ایک امین شخص (یعنی نبی اکرم صلی اللہ علیہ وسلم کی صاحبزادی تھی)۔ اللہ تعالیٰ اسے بہترین جزا عطا کرے، ہر شوہر اپنے علم کے مطابق ہی (اپنی بیوی کی) تعریف کرتا ہے “ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7010]

مصعب بن عمیر زبیری فرماتے ہیں: رسول اللہ صلی اللہ علیہ وسلم کی صاحبزادی، حضور کی تمام بیٹیوں میں سے بڑی تھیں۔ ان کی وفات کا سبب یہ تھا کہ جب آپ رسول اللہ صلی اللہ علیہ وسلم کے پاس جانے کے لئے مکہ سے نکلیں تو ہبار بن اسود اور ایک دوسرے آدمی نے ان کو پکڑ لیا، ان میں سے ایک نے ان کے اونٹ کو نیچے گرا دیا جس کی وجہ سے آپ بھی گر گئیں، آپ اس وقت حاملہ تھیں۔ نیچے گرنے کی وجہ سے ان کا حمل گر گیا، اور خون جاری ہو گیا، خون مسلسل بہتا رہا اور اسی تکلیف میں ان کا انتقال ہو گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7011]