حسین بن حارث جدلی، قیس کے قبیلہ جدیلہ سے ہیں، بیان کرتے ہیں کہ امیرِ مکہ نے خطبہ دیا اور کہا: ”رسول اللہ صلی اللہ علیہ وسلم نے ہم سے عہد لیا کہ ہم چاند دیکھ کر حج کے ارکان ادا کریں، اگر ہم خود نہ دیکھ سکیں اور دو عادل گواہی دے دیں تو ہم ان کی گواہی پر حج کر لیں۔“ (ابومالک کہتے ہیں) میں نے حسین بن حارث سے پوچھا: ”امیرِ مکہ کون تھا؟“ اس نے کہا: ”مجھے معلوم نہیں۔“ بعد میں وہ مجھے دوبارہ ملا تو بتایا کہ وہ (امیر) حارث بن حاطب تھے، یعنی محمد بن حاطب کے بھائی۔ پھر امیر نے کہا: ”بلاشبہ تم میں وہ شخصیت موجود ہے جو اللہ اور اس کے رسول صلی اللہ علیہ وسلم کے متعلق مجھ سے زیادہ باخبر ہے، اس بات کی شہادت اسی نے رسول اللہ صلی اللہ علیہ وسلم سے دی ہے“ اور اپنے ہاتھ سے ایک آدمی کی طرف اشارہ کیا۔ حسین نے بتایا: ”میں نے اپنے پہلو میں بیٹھے ہوئے ایک شخص سے پوچھا، یہ آدمی کون ہے جس کی طرف امیر نے اشارہ کیا ہے؟“ تو اس نے کہا: ”یہ سیدنا عبداللہ بن عمر رضی اللہ عنہ ہیں“ اور اس نے سچ کہا کہ یہ اللہ کے متعلق اس سے زیادہ جانتے تھے (احکامِ شریعت)، تو سیدنا عبداللہ بن عمر رضی اللہ عنہ نے کہا: ”رسول اللہ صلی اللہ علیہ وسلم نے ہمیں اسی بات کا حکم دیا ہے۔“ [سنن ابي داود/كتاب الصيام /حدیث: 2338]

ربعی بن حراش، اصحابِ نبی کریم صلی اللہ علیہ وسلم رضی اللہ عنہم میں سے کسی سے روایت کرتے ہیں کہ رمضان کے آخری دن کے متعلق لوگوں کا اختلاف ہو گیا۔ تو دو اعرابی آئے اور انہوں نے نبی کریم صلی اللہ علیہ وسلم کے سامنے اللہ کی گواہی دی (قسمیں اٹھائیں) کہ انہوں نے کل شام کو چاند دیکھا ہے۔ تو رسول اللہ صلی اللہ علیہ وسلم نے لوگوں کو حکم دیا کہ ”روزہ افطار کر لیں۔“ اور خلف بن ہشام کی روایت میں مزید یہ ہے کہ آپ صلی اللہ علیہ وسلم نے فرمایا: ”اگلے دن صبح کو (عید پڑھنے کے لیے) عید گاہ جائیں۔“ [سنن ابي داود/كتاب الصيام /حدیث: 2339]