حارث بن عمرو سہمی رضی اللہ عنہ فرماتے ہیں: میں نے رسول اللہ صلی اللہ علیہ وسلم کو دیکھا اور عرض کی: یا رسول اللہ صلی اللہ علیہ وسلم میرے لیے مغفرت کی دعا فرمائیے، حضور صلی اللہ علیہ وسلم نے میرے لیے مغفرت کی دعا فرما دی۔ میں نے ایک یا دو مرتبہ مزید حضور صلی اللہ علیہ وسلم سے یہی دعا کروائی، اسی اثناء میں ایک شخص بولا، کہنے لگا: یا رسول اللہ صلی اللہ علیہ وسلم عتیرہ اور فرع کے بارے میں آپ کی کیا رائے ہے؟ حضور صلی اللہ علیہ وسلم نے فرمایا: جو چاہے، عتیرہ ذبح کر لے اور جو چاہے، نہ کرے، جو چاہے، فرع ذبح کر لے اور جو چاہے نہ کرے اور بکری میں تمہاری قربانی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ حارث بن عمرو سہمی رضی اللہ عنہ مشہور صحابی ہیں، ان کی اولادیں بصرہ میں مشہور ہیں۔ اور عبدالرحمن بن مہدی بن قتیبہ اور دیگر محدثین نے یحیی بن زرارہ سے حدیث روایت کی ہے۔ جبکہ امام بخاری رحمۃ اللہ علیہ اور امام مسلم رحمۃ اللہ علیہ نے سعید زہری کے واسطے سے سیدنا سعید بن مسیب رضی اللہ عنہ کے حوالے سے سیدنا ابوہریرہ رضی اللہ عنہ کا یہ ارشاد نقل کیا ہے کہ رسول اللہ نے فرمایا: نہ کوئی فرع ہے اور نہ کوئی عتیرہ (اس حکم سے فرع اور عتیرہ کے احکام منسوخ ہو گئے۔) [المستدرك على الصحيحين/كِتَابُ الذَّبَائِحِ/حدیث: 7777]