سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: اس ذات کی قسم! جس نے مجھے حق کے ساتھ بھیجا ہے، یہ دنیا ختم نہیں ہو گی حتی کہ ان میں دھنسنا اور شکلیں تبدیل ہونا اور تہمتیں لگانے جیسے واقعات رونما ہوں گے، صحابہ کرام رضی اللہ عنہم نے پوچھا: یا نبی اللہ ہمارے ماں باپ آپ پر قربان ہو جائیں! یہ کب ہو گا؟ آپ صلی اللہ علیہ وسلم نے فرمایا: جب تم دیکھو کہ عورتیں سواریاں چلا رہی ہیں، اور گانے والیوں کی کثرت ہو گی، جھوٹی گواہیاں عام ہوں گی، مسلمان مشرکوں کے برتنوں یعنی سونے اور چاندی کے برتنوں میں مشروبات پئیں گے، مرد، مردوں سے اپنی لذت پوری کریں گے اور عورت، عورت سے اپنا کام چلائے گی، ان کو خود سے دور رکھنا، اور ان سے بچنے کے لئے تیار رہنا، حضور صلی اللہ علیہ وسلم نے اپنا چہرا چھپاتے ہوئے فرمایا: یوں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8553]

سیدنا علی رضی اللہ عنہ فرماتے ہیں: اس امت میں پانچ فتنے آئیں گے ایک فتنہ عام ہو گا، پھر ایک فتنہ خاص ہو گا، پھر ایک فتنہ عام ہو گا، پھر ایک فتنہ خاص ہو گا پھر ایک اندھا، بہرا اور گونگا فتنہ آئے گا اور اس فتنے میں لوگ جانوروں جیسے ہو جائیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8554]