عبدالعزیز بن صہیب روایت کرتے ہیں، سیدنا انس بن مالک رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: زمانے میں شدت بڑھے گی، لوگوں میں بخل بڑھے گا، اور قیامت سب سے شریر لوگوں پر قائم ہو گی۔ ٭٭ امام حاکم کہتے ہیں: اس حدیث کی جو علت مجھ تک پہنچی ہے وہ تعجب کرتے ہوئے میں نے یہاں ذکر کر دی ہے، دلیل کے طور پر نہیں کی۔ کیونکہ اس مقام پر اس کی بجائے درج ذیل حدیث ذکر ہونی چاہئے۔ سفیان ثوری، شعبہ زائدہ، اور دیگر ائمہ مسلمین نے عاصم بن بہدلہ سے، انہوں نے زر بن حبیش سے، انہوں نے عبداللہ بن مسعود رضی اللہ عنہ سے روایت کی ہے کہ رسول اللہ صلی اللہ علیہ وسلم نے ارشاد فرمایا: یہ دن اور رات ختم نہیں ہوں گے حتی کہ میرے اہل بیت میں سے ایک آدمی ایسا حکمران بنے گا، اس کا نام، میرے نام جیسا ہو گا، اور اس کے باپ کا نام بھی وہی ہو گا جو میرے باپ کا نام ہے، وہ روئے زمین پر انصاف ہی انصاف کر دے گا، جیسا کہ اس کے آنے سے پہلے وہ ظلم و ستم سے بھری تھی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8569]

سیدنا عبداللہ بن عمرو رضی اللہ عنہما فرماتے ہیں: لوگوں پر ایک زمانہ آئے گا کہ لوگ مسجدوں میں جمع ہوں گے لیکن ان میں ایک بھی صاحب ایمان نہیں ہو گا۔ ٭٭ یہ حدیث امام بخاری رحمۃ اللہ علیہ اور امامسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8570]