سیدنا عیاش ابن ابی ربیعہ رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ قیامت سے پہلے ایک ہوا آئے گی جو ہر مومن کی روح کو قبض کر لے گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8713]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا: یاجوج اور ماجوج کو کھول دیا جائے گا، یہ لوگوں پر حملہ آور ہوں گے، جیسا کہ اللہ تعالیٰ نے فرمایا ہے حَتَّى إِذَا فُتِحَتْ يَأْجُوجُ وَمَأْجُوجُ وَهُمْ مِنْ كُلِّ حَدَبٍ يَنْسِلُونَ (الانبياء: 96) ” یہاں تک کہ جب کھولے جائیں گے یاجوج و ماجوج اور وہ ہر بلندی سے ڈھلکتے ہوں گے یہ زمین میں فساد کریں گے اور مسلمان اپنے شہروں اور قلعوں سے ہٹ جائیں گے اور لوگوں کے مال اور مویشی اپنے ساتھ ملا لیں گے، اور زمین کے تمام پانی پی جائیں گے، حتی کہ ان میں سے ایک شخص کسی نہر سے گزرے گا، تو اس کا سارا پانی پی جائے گا، اور وہ نہر خشک ہو جائے گی، اس کے بعد کوئی آدمی وہاں سے گزرتا ہوا اس نہر کو دیکھ کر کہے گا: کبھی اس نہر میں بہت پانی ہوا کرتا تھا۔ جب کوئی بھی انسان باقی نہیں بچے گا، سوائے ان کے جو کسی قلعے میں یا شہر میں پناہ گزیں ہوں گے، تو ان میں سے ایک کہے گا: ہم زمین والوں سے تو فارغ ہو گئے ہیں، اب آسمان والے باقی رہتے ہیں، پھر ایک شخص اپنا نیزہ آسمان کی جانب پھینکے گا، وہ خون آلود ہو کر اور آزمائش بن کر واپس آئے گا، اسی اثناء میں اللہ تعالیٰ ان کی گردن میں ایک کیڑا پیدا کر دے گا، اور وہ ان کی گردنوں سے نکلے گا، اور صبح کے وقت سب مر چکے ہوں گے، ان کی کوئی آواز سنائی نہیں دے گی، مسلمان کہیں گے؟ کوئی آدمی ایسا نہیں ہے جو ہمارے لئے اپنی جان کو بیچ دے، وہ ان دشمنوں کی یہ حالت دیکھے گا، پھر ان میں سے ایک آدمی اپنی قربانی دینے کی نیت سے ان سے الگ ہو گا اور وہ اپنے قتل ہونے کا مکمل یقین کرتے ہوئے نیچے اترے گا، وہ دیکھے گا کہ سب ایک دوسرے کے اوپر مرے پڑے ہیں، وہ آواز دے کر کہے گا: اے مسلمانوں تمہیں مبارک ہو، اللہ تعالیٰ نے تمہارے دشمن کا صفایا کر دیا ہے، پھر مسلمان اپنی بستیوں اور قلعوں سے باہر آ جائیں گے، اور وہ اپنے مویشیوں کو ڈھونڈیں گے، لیکن ان کو صرف ان کا گوشت ملے گا، وہ اس کا شکر ادا کریں گے، جیسے کہ کوئی جڑی بوٹی کو جب بارش مل جائے تو وہ شکر ادا کرتی ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8714]