عبداللہ بن مغفل رضی اللہ عنہ کے صاحبزادے بیان کرتے ہیں کہ عبداللہ بن سلام کے بیٹے شام کی جانب جا رہے تھے، سیدنا عبداللہ نے اپنے گھر کی چھت کے اوپر سے ان کو دیکھ لیا، اور بولے: اے بیٹے! خود کو آزمائش میں مت ڈالو، شام سے مسلمانوں کی چیخوں کی آوازیں آئیں گی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8865]

سیدنا ابوالاسود دیلی رضی اللہ عنہ فرماتے ہیں: میں اور زرعہ بن ضمرہ اشعری رضی اللہ عنہ سیدنا عمر بن خطاب رضی اللہ عنہ کے پاس گئے، سیدنا عبداللہ بن عمرو رضی اللہ عنہما سے ہماری ملاقات ہوئی، انہوں نے کہا: قریب ہے کہ سرزمین عجم پر عربیوں میں سے صرف ایک مقتول یا ایک قیدی باقی بچے گا جس کے خون کا فیصلہ کر دیا جائے گا، سیدنا زرعہ نے کہا: کیا مشرکین، مسلمانوں پر غالب آ جائیں گے؟ انہوں نے پوچھا: تم کس قبیلے سے تعلق رکھتے ہو؟ انہوں نے کہا: میں بنی عامر بن صعصعہ سے تعلق رکھتا ہوں، انہوں نے فرمایا: اس وقت تک قیامت قائم نہیں ہو گی جب تک بنی عامر کی عورتیں ذی الخلصہ کا دفاع نہیں کریں گی، جاہلیت میں اس کو وثن کہا جاتا تھا۔ آپ فرماتے ہیں: ہم نے سیدنا عمر بن خطاب رضی اللہ عنہ کو عبداللہ بن عمرو رضی اللہ عنہما کا قول سنایا، سیدنا عمر رضی اللہ عنہ نے تین مرتبہ کہا: عبداللہ بن عمرو رضی اللہ عنہما جو کچھ کہہ رہے ہیں وہ اپنے قول کے بارے میں بہتر جانتے ہیں، پھر جمعہ کے دن سیدنا عمر بن خطاب رضی اللہ عنہ نے خطبہ دیا اور فرمایا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ میری امت میں ایک جماعت ہمیشہ حق پر قائم رہے گی ان کی مدد کی جاتی رہے گی حتی کہ اللہ کا حکم آ جائے، آپ فرماتے ہیں: ہم نے سیدنا عمر رضی اللہ عنہ کی یہ بات سیدنا عبداللہ بن عمرو رضی اللہ عنہما کو بتائی تو انہوں نے فرمایا: اگر بات وہی ہے جو تم نے کہی ہے تو اللہ تعالیٰ کے نبی علیہ السلام نے بالکل سچ فرمایا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8866]