ابن جریج رحمہ اللہ سے روایت ہے فرمایا: ”میں نے عطاء رحمہ اللہ سے اللہ کے فرمان ”نہ تم شکار کو قتل کرو جبکہ تم حالتِ احرام میں ہو، اور جو کوئی تم میں سے اسے جان بوجھ کر قتل کرے گا“ (المائده: 95) کے متعلق پوچھا: کیا جس نے بغیر ارادہ کے قتل کیا، اس پر بھی دیت ہے؟ عطاء رحمہ اللہ نے فرمایا: ہاں، اس سے اللہ کی حرمات کی تعظیم ہوتی ہے اور اسی طرح عمل ہو چکے ہیں۔“ [مسند امام شافعی/كِتَابُ الحَجِّ/حدیث: 878]

عمرو بن دینار رحمہ اللہ سے روایت ہے فرمایا: ”میں نے دیکھا کہ لوگ (جانور کے) قتلِ خطا میں بھی دیت دیتے۔“ [مسند امام شافعی/كِتَابُ الحَجِّ/حدیث: 879]

ابن جریج نے کہا مجاہد رحمہ اللہ فرماتے تھے کہ جس نے تم میں سے (شکار کو) جان بوجھ کر بغیر بھولے قتل کر دیا اس کے احرام ہوتے ہوئے اور اس (قاتل) کا اس کے علاوہ اور کوئی ارادہ نہیں، تو اس نے غلطی کی اور وہ حلال ہو گیا اور اس کے لیے کوئی رخصت نہیں؛ اور جس نے اس کی حرمت کو یاد نہ رکھتے ہوئے قتل کر دیا یا اس کے علاوہ کسی اور کا ارادہ تھا تو اس سے بھی غلطی ہوئی یہ (غلطی والا) ارادہ ایسا ہے جس پر (اس کی مثل) جانور سے کفارہ ہے۔ [مسند امام شافعی/كِتَابُ الحَجِّ/حدیث: 880]

ابن جریج سے روایت ہے فرمایا، میں نے عطاء رحمہ اللہ سے کہا: ”اور فدیہ واجب ہے اس جانور کے مساوی جس کو اس نے قتل کیا، جس کا فیصلہ تم میں سے دو قابل اعتبار شخص کریں (خواہ وہ فدیہ چوپایوں میں سے ہو) جو ہدی کے طور پر کعبہ تک پہنچایا جائے یا کفارہ کے طور پر مساکین کو کھانا کھلا دیا جائے۔“ (المائدہ: 95) عطاء رحمہ اللہ نے کہا، اس لیے کہ اس نے حرم میں اس جانور کا شکار کیا ہے اور وہ بیت اللہ کا ارادہ بھی رکھتا ہے تو اس کا کفارہ بھی بیت اللہ کے پاس ہی ادا کرنا ہے۔ [مسند امام شافعی/كِتَابُ الحَجِّ/حدیث: 881]

عمرو بن دینار سے اللہ کے فرمان: ”فدیہ ہے خواہ روزے رکھ لے، خواہ صدقہ کرے، خواہ قربانی کر دے۔“ (البقرہ: 196) کے متعلق روایت ہے کہ اس میں اختیار ہے جو چاہے کرے۔ [مسند امام شافعی/كِتَابُ الحَجِّ/حدیث: 882]