جناب عبداللہ بن سائب بن یزید اپنے والد سے، وہ دادا رضی اللہ عنہ سے روایت کرتے ہیں کہ انہوں نے نبی کریم صلی اللہ علیہ وسلم کو فرماتے سنا: ”تم میں سے کوئی شخص اپنے بھائی کی کوئی چیز ہرگز نہ لے، نہ ہنسی مذاق میں اور نہ حقیقت میں سچے طور پر۔“ سلیمان (سلیمان بن عبدالرحمٰن) کے لفظ تھے «لَعِبًا وَلَا جِدًّا» ”نہ مذاق کے طور پر اور نہ سنجیدگی کے طور پر“ ”اور جس نے اپنے بھائی سے (کوئی) لاٹھی (بھی) لی ہو تو اسے واپس کر دے۔“ محمد بن بشار نے (عبداللہ بن سائب کے نسب میں) ”ابن یزید“ نہیں کہا اور ( «سَمِعَ النَّبِيَّ صلی اللہ علیہ وسلم يَقُولُ» ”نبی صلی اللہ علیہ وسلم کو فرماتے سنا“ کی بجائے) «قَالَ رَسُولُ اللّٰهِ صلی اللہ علیہ وسلم » ”رسول اللہ صلی اللہ علیہ وسلم نے فرمایا“ کہا۔ [سنن ابي داود/كِتَاب الْأَدَبِ/حدیث: 5003]

عبدالرحمٰن بن ابولیلیٰ رحمہ اللہ روایت کرتے ہیں کہ محمد صلی اللہ علیہ وسلم کے صحابہ رضی اللہ عنہم نے ہمیں بیان کیا کہ وہ لوگ نبی کریم صلی اللہ علیہ وسلم کے ساتھ سفر میں جا رہے تھے، تو ان میں سے ایک آدمی سو گیا اور دوسرا اس سے ایک رسی لینے لگا جو اس کے پاس تھی، تو وہ ڈر گیا، تو نبی کریم صلی اللہ علیہ وسلم نے فرمایا: «لَا يَحِلُّ لِمُسْلِمٍ أَنْ يُرَوِّعَ مُسْلِمًا» ”کسی مسلمان کے لیے حلال نہیں کہ دوسرے مسلمان کو ڈرائے۔“ [سنن ابي داود/كِتَاب الْأَدَبِ/حدیث: 5004]