قبیلہ بنو زہرہ کے مولیٰ حضرت ابو عیاش زید رضی اللہ عنہ سے روایت ہے کہ انہوں نے حضرت سعد بن ابی وقاص رضی اللہ عنہ سے جَو کو سُلت کے عوض خریدنے کا مسئلہ پوچھا تو حضرت سعد رضی اللہ عنہ نے فرمایا: ”ان میں بہتر جنس کون سی ہے؟“ حضرت زید رضی اللہ عنہ نے کہا: (میں نے کہا) ”جَو۔“ تو سعد رضی اللہ عنہ نے مجھے اس تبادلے سے منع فرما دیا اور فرمایا: ”میں نے خود سنا کہ رسول اللہ صلی اللہ علیہ وسلم سے خشک کھجور کے عوض تازہ کھجور خریدنے کے بارے میں پوچھا گیا تو آپ صلی اللہ علیہ وسلم نے فرمایا: ”کیا تازہ کھجور خشک ہو کر (وزن میں) کم ہو جاتی ہے؟“ صحابہ کرام رضی اللہ عنہم نے کہا: ”جی ہاں۔“ تو رسول اللہ صلی اللہ علیہ وسلم نے اس بیع سے منع فرما دیا۔“ [سنن ابن ماجه/كتاب التجارات/حدیث: 2264]