نمران بن جاریہ رحمہ اللہ اپنے والد (جاریہ بن ظفر رضی اللہ عنہ) سے روایت کرتے ہیں کہ ایک آدمی نے دوسرے کی کلائی پر تلوار مار کر جوڑ کے علاوہ دوسری جگہ سے بازو کاٹ دیا۔ اس نے نبی صلی اللہ علیہ وسلم سے شکایت کی۔ نبی صلی اللہ علیہ وسلم نے اسے دیت دلوانے کا حکم دے دیا۔ اس نے کہا: ”اللہ کے رسول صلی اللہ علیہ وسلم ! میں تو قصاص لینا چاہتا ہوں۔“ رسول اللہ صلی اللہ علیہ وسلم نے فرمایا: ”دیت لے لے، اللہ تجھے برکت عطا فرمائے۔“ رسول اللہ صلی اللہ علیہ وسلم نے اس کے لیے قصاص کا فیصلہ نہ دیا۔ [سنن ابن ماجه/كتاب الديات/حدیث: 2636]

حضرت عباس بن عبدالمطلب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”دماغ کی جھلی تک پہنچ جانے والے زخم کا قصاص نہیں، نہ جسم کے اندرونی خلا (مثلاً پیٹ) تک پہنچ جانے والے زخم میں اور نہ ہڈی کو اپنی جگہ سے ہٹا دینے والی چوٹ میں قصاص ہے۔“ [سنن ابن ماجه/كتاب الديات/حدیث: 2637]