حضرت رفاعہ بن شداد قتبانی رحمہ اللہ سے روایت ہے، انہوں نے کہا: ”اگر میں نے حضرت عمرو بن حمق خزاعی رضی اللہ عنہ سے ایک حدیث نہ سنی ہوتی تو مختار ثقفی کے سر اور دھڑ کے درمیان چلتا (اس کا سر دھڑ سے الگ کر دیتا)، میں نے حضرت عمرو رضی اللہ عنہ سے سنا کہ رسول اللہ صلی اللہ علیہ وسلم نے فرمایا: ”جس شخص سے کوئی اپنا خون محفوظ سمجھتا ہو اور وہ اسے قتل کر ڈالے تو قیامت کے دن وہ (قاتل) عہد شکنی کا جھنڈا اٹھائے ہوئے ہوگا۔“” [سنن ابن ماجه/كتاب الديات/حدیث: 2688]

حضرت رفاعہ رحمہ اللہ سے روایت ہے، انہوں نے کہا: ”میں مختار ثقفی کے پاس اس کے محل میں گیا، اس نے کہا: ”جبرائیل علیہ السلام ابھی ابھی میرے پاس سے اٹھ کر گئے ہیں۔“ میں صرف اس لیے اسے قتل نہ کر سکا کہ میں نے سلیمان بن صرد رضی اللہ عنہ سے نبی صلی اللہ علیہ وسلم کی یہ حدیث سنی تھی کہ آپ صلی اللہ علیہ وسلم نے فرمایا: ”جب کوئی شخص تجھ سے اپنے خون کے بارے میں مطمئن ہو (اسے یقین ہو کہ اس کے ہاتھ سے میری جان محفوظ ہے) تو اسے قتل نہ کر۔“ اسی (فرمان) نے مجھے اس (کو قتل کرنے) سے روک دیا۔“ [سنن ابن ماجه/كتاب الديات/حدیث: 2689]